Media raportoi të mërkurën për një aksion të Njësisë Kundër Trafikimit me Narkotikë në Policinë Rajonale në Pejë, në vazhdimësi të një rasti që po hetohej muaj më parë që lidhet me shitblerjen e substancave narkotike. Aksioni është zhvilluar në Pejë dhe Istog, ku janë arrestuar dy persona të dyshuar.
Burimet brenda Prokurorisë kanë bërë me dije se dy të dyshuarit janë Jeton Kelmendi, i cili ka përfunduar në ndalim policor dhe Lekë Prekaj, i cili do të hetohet në procedurë të rregullt.
Pas kontrollit të dy lokacioneve, zyrtarët policorë të Antidrogës kanë sekuestruar një sasi të drogës, para të gatshme dhe armë e municion.
Në bazë të informacioneve të para, te i dyshuari Kelmendi është gjetur kokainë, mbi 18 mijë euro, armë e dhjetëra fishekë.
Ndërsa të i dyshuari tjetër Prekaj, pas bastisjes janë gjetur disa pajisje për matjen e narkotikëve, si dhe municion.
Provat që janë gjetur janë sekuestruar, ndërsa të dyshuarit janë shoqëruar në stacion policor, ku janë intervistuar lidhur me rastin.
Lidhur me rastin, Prokurori i Shtetit ka urdhëruar ndërmarrjen e të gjitha veprimeve të nevojshme hetimore brenda afatit ligjor.
Lajmin e kanë konfirmuar edhe nga Policia Rajonale në Pejë.
