Pompat e derivateve jo rrallëherë janë cak i hajnave. Kjo dukuri po krijon pasiguri dhe frikë si për qytetarët ashtu edhe për punëtorët që punojnë në këto biznese. Për një rast të tillë që ka ndodhur mbrëmë pas mesnate në Prishtinë, Prokuroria ka nisur hetimet.
Cak i hajnave mbrëmë ishte pika e pompës së derivateve ‘Shell’ në rrugën ‘Isa Kastrati’, ku tre persona të maskuar kanë marrë pazarin ditor si dhe pako me cigare.
Hajnat paraprakisht janë përballur me dy punëtorë, të cilët dyshohet se i kanë sulmuar, kanë kryer grabitjen dhe më pas janë zhdukur.
Me t’u denoncuar rasti, Policia ka dalë në vendin e ngjarjes ku kanë kryer ekzaminimet e nevojshme që ndihmojnë në zbardhjen e rrethanave të rastit.
Në kuadër të veprimeve hetimore janë intervistuar edhe dy punëtorët e kompanisë, të cilët kanë deklaruar se të dyshuarit menjëherë pas kryerjes së veprës janë larguar me shpejtësi me një veturë.
Me urdhër të prokurorit, rasti është cilësuar ‘Grabitje ’, teksa veprimet tjera ligjore do merren posa të kapen të dyshuarit.
