Dënohet me 1 vit e 5 muaj burgim personi që sulmoi kameramanin

Kronikë

Dënohet me 1 vit e 5 muaj burgim personi që sulmoi kameramanin

Më: 23 qershor 2025 Në ora: 12:07
Foto ilustrim

Gjykata Themelore në Mitrovicë, Departamenti i Përgjithshëm – Divizioni Penal, ka shpallur aktgjykim dënues ndaj të pandehurit I.M., shtetas i Republikës së Kosovës, i cili akuzohej për veprën penale “Lëndim i lehtë trupor” sipas nenit 185 paragrafi 1, nënparagrafi 1.4 të Kodit Penal të Republikës së Kosovës (KPRK), në bashkëkryerje me një person tjetër të paidentifikuar.

Sipas aktgjykimit, i pandehuri u shpall fajtor për sulmin e ndodhur më 17 nëntor 2022, në rrugën “H. D. (V.C)” në Mitrovicën e Veriut, ku në bashkëkryerje me N.N. persona kishte sulmuar fizikisht kameramanin e portalit “Insajderi”, J.M., duke i shkaktuar lëndime të lehta trupore. Sulmi kishte ndodhur teksa i dëmtuari po filmonte një ngjarje pranë urës së Ibrit, ku kishte parë disa fëmijë që kërkonin ndihmë nga pjesëtarët e KFOR-it italian. Derisa po incizonte situatën me telefonin e tij, ai ishte sulmuar nga i pandehuri I.M., i cili e kishte goditur pas koke dhe kishte tentuar t’ia merrte telefonin, por pa sukses.

Sipas ekspertizës mjekoligjore, lëndimet e shkaktuara ndaj të dëmtuarit janë klasifikuar si lëndime të lehta trupore me ndikim të përkohshëm në shëndetin e tij.

Gjykata ka shqiptuar dënim me 1 vit e 5 muaj burgim për të pandehurin I.M., i cili do të fillojë së ekzekutuari brenda 15 ditësh nga dita kur aktgjykimi bëhet i plotfuqishëm.

Palët kanë të drejtë ankese ndaj këtij aktgjykimi brenda afatit prej 30 ditësh, duke iu drejtuar Gjykatës së Apelit përmes Gjykatës Themelore në Mitrovicë.

comment Për komente lëvizni më poshtë
Më të lexuarat
Sot mund të lexoni Shfletoni kopertinat