Një person është arrestuar nga Policia e Kosovës gjatë natës së kaluar në Mitrovicën e Jugut, nën dyshimin për armëmbajtje pa leje.
Rreth orës 03:00, patrulla e Njësisë së Trafikut Rajonal, gjatë një pikë-kontrolli në rrugën “Ulqini”, tentoi të ndalojë një veturë me targa vendore që drejtohej nga i dyshuari. Ky i fundit nuk iu bind urdhrit të policisë dhe vazhdoi lëvizjen, duke detyruar patrullën që me mbështetjen e njësive tjera të niste ndjekjen.
Në një moment, i dyshuari braktisi automjetin dhe tentoi të largohej në këmbë, duke u përpjekur të fshehë një armë pistoletë me shtatë fishekë duke e hedhur nga trupi. Policia reagoi me shpejtësi, duke e arrestuar dhe duke sekuestruar armën.
Pas intervistimit, me urdhër të prokurorit të shtetit, i dyshuari (m/k/sh) është liruar në procedurë të rregullt. Ndaj tij është iniciuar rast penal për veprën penale “Mbajtje në pronësi, kontroll ose posedim të paautorizuar të armës”.