O Berat, si vetull hëne
Me Osumin mespërmes
Pikon mjaltë e vargje kënge
Mbi kalldrëmet në mëngjes.
Këngë me iso labërisht,
Malli rigon shi kujtese
Të kam ndjekur çmendurisht
Rrugëve me premtim bese…
Mbi qerpik të vetë lules
Flladit kroj i dashurisë…
O Berat me shkulme lufte
Je vetë ashti i shqiptarisë…
Të ke hije fjalë e burrit
Sharm i dehur femëror
Krenarinë në palë të flamurit
Trashëgon gjaku yt arbëror.
Gjak nga gjak i Skënderbeut
Shpirt nga shpirti i lirisë
Ti nga toka porsi Anetu
I bën zë fort Shqiptarisë…
