E dua me shpirt kombin tim

Kultura

E dua me shpirt kombin tim

Nga: Emine Hoti Më: 3 mars 2026 Në ora: 11:33
Autorja Emine Hoti

E dua me shpirt kombin tim,

dua për të paqe dhe begati,

është amaneti i dëshmorëve,

që dhanë jetën për liri!

E dua me shpirt kombin tim,

ndër kombet e lashtë në botë,

margaritar i zemrave tona,

vendi i shqipeve që duam fort!

E dua me shpirt kombin tim,

është më i rralli në planet,

gjuha dhe bijtë e tij legjendarë,

më bëjnë krenare për jetë!

E dua me shpirt kombin tim,

historinë e tij të lavdishme,

nderoj dëshmorët e tij,

traditat e bukura fisnike.

E dua me shpirt kombin tim,

do ta dua atë sa të jetë jeta,

është zemra dhe shpirti im,

është atdheu, liria, e vërteta!

SHQIPTARISHT

Na bashkon në këtë tokë gjuha dhe flamuri,

na bashkon atdheu, historia, të parët tanë,

na bashkojnë legjendat dhe hyjneshat tona,

na bashkon vendlindja jonë e zjarrtë.

Unë jam shqiptare nga Kosova a Shqipëria,

ti nga Maqedonia e veriut, Mali i Zi, Presheva,

ja edhe shqiptari e shqiptarja nga Çamëria,

atdheu ynë i lashtë është Iliria.

Jemi si gonxhe në një buqetë lulesh të rralla,

na kanë ndarë padrejtësisht dhe barbarisht,

uroj që të bëhemi si dikur një tufë e bukur,

vëllezër e motra të bashkohemi shqiptarisht!

VATRA MIKPRITËSE

Vatrat tona shqiptare mikpritëse,

të sinqerta dhe të hapur për miq,

respektojnë të mirët e të diturit,

lënë jashtë derës vetëm armiqtë.

Kemi përvoja të mira e të liga në jetë,

kemi qenë të hapur e kemi ofruar miqësi,

ndonjëherë jemi djegur e shkrumbuar,

se armiku është fshehur si gjarpri në gji.

Në kullat tona gjithnjë një pjatë më shumë,

është për mikun e papritur që mund të vijë,

kjo është tradita e të parëve tanë në shekuj,

kur vjen miku “gëzohen dhe trarët e shtëpisë”.

Populli ynë ka dhënë shembuj në botë,

shembuj të humanizmit dhe të dashurisë,

kemi shembullin e madh të Nënës Terezë,

kemi shembullin e besës dhe të miqësisë.

comment Për komente lëvizni më poshtë
Sot mund të lexoni Shfletoni kopertinat