Partia Aleanca për Shqiptarët ka prezantuar mbrëmë në Kumanovë kandidatin për kryetar dhe listën e këshilltarëve në këtë komunë.
Kreu i partisë, Ziadin Sela, tha se shqiptarët e kuptojnë simbolikën e kandidimit në Kumanovë dhe Shkup, ku votohet jo për të fituar, por për të treguar se shqiptarët e dinë që në lagjet e tyre mungon gjithçka vetëm sepse ata janë shqiptarë.
“Bashkimi është këtu t’i bëjë bashkë shqiptarët që mendojnë se “Lagja e trimave” u dogj se ishe lagje trimash jo se ishte “divo naselje”, pra se është e banuar me shqiptarë e jo me qytetarë. Kjo është simbolika e kandidaturës së Bashkimit në Kumanovë edhe Naimit në Shkup. Jam i bindur që shqiptarët do ta kuptojnë këtë mesazh”,- tha kryetari i Partisë Aleanca për Shqiptarët, Zijadin Sela.
Ne duam që Kumanova të mbajë aromën shqiptare, deklaroi kandidati i ASh-së, Bashkim Osmani.
“Hisja jonë duhet të jetë në vendimmarrjen e pushtetit lokal. Momentalisht kjo vendimmarrje është në duart e tjetërkujt, ne si shqiptarë jemi aty në mënyrë simbolike. Kanë angazhuar një njeri që vetëm përkthen, e ka shkuar atje me votën e shqiptarëve dhe asnjë përpjekje nuk e bën për të mirën e shoqërisë”,- tha kandidati për Komunën e Kumanovës, Partia Aleanca për Shqiptarët, Bashkim Osmani.
Këto zgjedhje nuk janë zgjedhje të zakonshme, nuk janë zgjedhje lokale, por kanë peshën e referendumit për shqiptarët për të njëjtat arsye nga të cilat buron edhe ekzistenca e Aleancës për Shqiptarët, u tha në tubim.