Festë, muzikë e rrahje në lokal nga “njerëz të fortë” edhe gjatë orës policore

Mitrovica

Festë, muzikë e rrahje në lokal nga “njerëz të fortë” edhe gjatë orës policore

Më: 30 prill 2021 Në ora: 13:33
Ilustrim

Edhe pse rregullat kundër pandemisë të vëna nga Ministria e Shëndetësisë ndalojnë aktivitetet e kafiterive dhe restoranteve pas orës 22:30 në mbarë territorin e Republikës së Kosovës, në veri të vendit këto rregulla nuk respektohen.

Kështu, të enjten mbrëma në kafiterinë “Knez” në veri të Mitrovicës, pronar i së cilës është Radosh Petroviq, “njerëz të fortë” kanë organizuar party me muzikë live deri pas orës 1:00 të mëngjesit, ndërsa ka pasur edhe rrahje mes vete, bëjnë të ditur burime të kp.

Sipas këtyre burimeve, brenda lokalit kanë qenë më shumë se 70 persona, ndërsa edhe përkundër thirrjeve të qytetarëve për ndihmë për shkak të shqetësimit nga zhurma dhe muzika e lartë në orët e vona, organet kompetente nuk kanë reaguar.

“Po, mbrëmë gjatë natës kanë festuar ‘njerëz të fortë’ me muzikë live në “Knez” deri në orët e pasmesnatës. Nuk di çfarë kanë festuar saktë. Gjatë tërë kohës pjesëtarë të Kompanisë “Guard Vuk” kanë siguruar lokalin nga jashtë. Në një moment ka pasur edhe tension mes dy tavolinave, me ç’rast njëri prej pjesëmarrësve është qëlluar me grusht, por shpejtë kanë ndërhyrë të tjerët për ta qetësuar situatën. Në një moment tjetër, kam parë pjesëtarë të policisë që kanë ardhur para derës, por me të kuptuar për identitetin e të pranishmëve, ata nuk kanë intervenuar”, kanë thënë burimet.

I pyetur se kush janë ‘njerëzit e fortë’, njëri prej burimeve ka thënë se ata janë ‘peshq të mëdhenj të nëntokës nga veriu e nga Serbia, të cilëve as policia s’ju bën dot gjë”.

Media ka kontaktuar me zëdhënësin e policisë për rajonin e veriut, Branisllav Radoviq, për të kuptuar më shumë rreth kësaj ngjarje, por ai ka qenë i shkurtër në përgjigjen e tij.

“Nuk kam ndonjë raport zyrtar rreth këtij rasti”, ka thënë Radoviq. 

commentFirst article
Sot mund të lexoni Shfletoni kopertinat