Krasniqi: Totaj është kandidat i gjithë qytetarëve të Prizrenit dhe do të bashkëqeverisë me ta

Aktuale

Krasniqi: Totaj është kandidat i gjithë qytetarëve të Prizrenit dhe do të bashkëqeverisë me ta

Më: 10 nëntor 2021 Në ora: 18:38
Foto nga vendi i ngjarjes

Në ditën e tretë të fushatës zgjedhore, kandidati për kryetar të Prizrenit, Shaqir Totaj së bashku me kryetarin e PDK-së, Memli Krasniqi kanë takuar gratë e qytetit të Prizrenit. Atyre iu premtua më shumë prioritet në vendimmarrjen lokale dhe u kërkua që ato të jenë bartëse të ndryshimit në Prizren.

Lideri i PDK-së, Memli Krasniqi, duke premtuar mirëqenie më të madhe për gratë në Prizren, tha se ndihet mirë dhe i sigurt për fitoren më 14 nëntor.

“Ndihem mirë dhe i sigurt për fitoren që na pret më 14 nëntor. I falënderoj edhe gratë e koalicionit që mbështesin zotëri Totajt. Kjo i jep kuptim edhe sloganit të Shaqës, sepse vërtet jemi bashkë për Prizrenin. Prej fillimit kemi thënë se Shaqa është kandidat i gjithë Prizrenit dhe do të bashkëqeverisë me ta, do të jetë gjithmonë dhe detyruar vetëm ndaj tyre… Katër vjetët e fundit është ndal ora, ka pasur regres dhe prapakthim. Nuk ka pasur zhvillim dhe çlirim të potencialit që ekziston në mesin e juaj. Ka qenë e pakuptimtë se edhe drejtorët komunalë nuk janë zgjedhur nga Prizreni”, tha Krasniqi, transmeton KP.

Pretendenti për të parin e Prizrenit, Shaqir Totaj, tha se gratë në qeverisjen e tij do të kenë pozita të rëndësishme ekzekutive.

“Pozita e gruas në një shoqëri është përcaktues për zhvillimin e shoqërisë. Në të ardhmen gratë do të kenë pozita të rëndësishme në qeverisjen lokale të Prizrenit. Është një potencial i madh në Prizren dhe domosdoshmërisë duhet të kenë përfaqësim të grave për zhvillimin e ardhshëm të Prizrenit. Çka kemi pa në katër vitet e kaluara, kemi pa diskriminim të gruas”, tha ai.

Pjesë e këtij takimi ishte edhe nënkryetarja e PDK-së, Vlora Çitaku, e cila tha se gratë duhet të jenë bartëse e ndryshimit në Prizren.

“Veç një zhig e kam në jetë që s’jam e Prizrenit. Prizreni është qyteti historik i Kosovës dhe shqiptarëve. Neve kur na vjen një mysafir prej jashtë ditën e dytë e sjellim në Prizren. Fatkeqësisht në Prizren nuk kam pa përparim dhe zhvillim në Prizren, i vetmi zhvillim që kam parë është bërlloku, papastërtia dhe ndërtimet e vrazhda në Prizren… Kur gratë e Prizrenit vendosin diçka dhe kur e ndajnë mendjen edhe e realizojnë. Unë e di që gratë e Prizrenit do të jenë bartëset e fitores së 14 nëntorit. Të dielën me Shaqën nuk fiton PDK-ja, por fiton Prizreni”, tha Çitaku.

Në zgjedhjet e raundit të dytë të 14 nëntorit, Totaj do të garojë me kandidatin e LVV-së, Mytaher Haskuka.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat