Ministri i ri i Shëndetësisë, Rifat Latifi u ka bërë thirrje qytetarëve që të vaksinohen kundër virusit Covid-19.
Ai tha se ky virus është ende prezent në vend dhe se vetëm përmes vaksinimit shkollat, ekonomia dhe bizneset mbahen hapur.
“Për qytetarët ne mos të harrojmë që Covidi nuk ka ikur dhe është këtu në mesin tonë me një variant ose një variant tjetër, Delta apo ndonjë variant tjetër. Ju lutem vaksinohuni. Nëse vaksinohemi ne mund t’i mbajmë shkollat hapur, bizneset hapur, ekonominë hapur, mund të udhëtojmë. Prandaj shkoni vaksinoheni. Nuk keni nevojë me qenë vetëm në Prishtinë por në të gjitha qendrat anembanë, pavarësisht a je qytetarë i Kosovës apo nuk je”, tha Latifi.
Më tutje, Latifi tha se do të dërgojnë edhe ekipe në vende më të largëta për të vaksinuar qytetarët.
“Ne do të vijmë edhe ekipe mobile në vendet më të largëta që t’ua mundësojmë juve që të vaksinoheni”, ka thënë më tutje ai.
Këto komente ministri i ri i Shëndetësisë i bëri gjatë një vizite në Qendrën e Vaksinimit “1 Tetori”, në Prishtinë.
