Akuzohet se i shërbeu Hashim Thaçit, reagon Rozeta Hajdari

Aktuale

Akuzohet se i shërbeu Hashim Thaçit, reagon Rozeta Hajdari

Më: 20 janar 2022 Në ora: 16:55
Rozeta Hajdari

Shefi i Grupit Parlamentar të PDK-së, Abelard Tahiri, ka thënë se ministrja Rozeta Hajdari, ka qenë këshilltare e ish-kryeministrit Hashim Thaçi.

Tahiri thotë se ajo i ka shërbyer qeverive të mëparshme, teksa shtoi se këto 12 vitet e fundit, qytetarët e Kosovës e kanë paguar më së liri energjinë në Evropë.

“Unë mesa e di edhe ministrja është qytetare rezidente e Kosovës. Edhe këto vite pas shpalljes së pavarësisë i ka shërbyer qeverive të mëparshme dhe mirë me bo një autokritikë qysh e boni një deputete në raport me liderin e tyre suprem dhe me tregu për gabimet që i ka bo në të kaluarën dhe tash sa mirë është duke marrë drejtim. Dhe, ministre këto 12 vite qytetarët e Kosovës e kanë paguar energjinë më të lirën në Evropë. Veç Ukraina e ka paguar më lirë se na. Kurrë s’ka pasur reduktime, ndërkaq në Qeverinë tënde ku ti po shërben, Republika e Kosovës është një nga 10 vendet që ka me pagu më së shtrenjti energjinë. Qe ku e ki pru Kosovën mas 20 vjete. Mas 20 vjete i ki kthy reduktimet, e ki rritë energjinë elektrike, si rezultat i neglizhencës tuaj”, tha Tahiri.

Lidhur me këtë ka reaguar vet ministrja Hajdari, e cila ka thënë se ka qenë vetëm eksperte e UNDPI dhe se e ka ndihmuar Qeverinë Çeku.

“Deputet Tahiri ju keni thënë se unë kam qenë këshilltare e ish-kryeministrit Thaçi. A mund ta dokumentoni ndonjëherë nëse unë kam pasur kontratë si ish-këshilltare e Thaçit dhe a jam paguar nga Qeveria e Kosovës si ish-këshilltare e ish-kryeministrit Thaçi. Kur ma sjellë atë kontratë mund të flasim. Unë isha eksperte e UNDPI që jam paguar me kontratë të jashtme që t’i ndihmojë Qeverisë Çeku. Më keni trashëguar me kontratë të jashtme dhe kam punuar deri në maj të vitit 2008. Më keni ofruar të jem këshilltare e juaj, s’kam pranuar. Kam vazhduar tre muaj pa kontratë që mos t’iu lë juve në baltë, për mos ta lënë Kosovën në baltë, sepse ishte”, deklaroi ajo në seancën që po mbahet në Kuvendin Kosovës.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat