Të hënën merret vendimi i madh për faturat e rrymës

Aktuale

Të hënën merret vendimi i madh për faturat e rrymës

Më: 28 janar 2022 Në ora: 14:51
Foto ilustrim

Më 31 janar, të hënën, pritet të merret vendimi nëse do të miratohet propozimi për tarifat e reja të energjisë elektrike.

Njoftimin e ka dhënë Zyra e Rregullatorit të Energjisë, përmes një njoftimi në faqen e saj në facebook.

“Bordi i Zyrës së Rregullatorit për Energji do të mbajë seancën e tij të dytë (II) për këtë vit. Seanca do të mbahet me datë 31 janar 2022 prej orës 14:00, në zyrat e ZRRE”, thuhet në njoftim.

Si pikë e rendit të ditës është edhe shqyrtimi i propozimit për tarifa të reja të energjisë elektrike. Seanca e Bordit përveç që është e hapur për publikun, po ashtu do të transmetohet drejtpërdrejt përmes profilit në facebook.

Ndryshe, nëse miratohet ky propozim, atëherë, rryma pritet të shtrenjtohet për 9 për qind, për kategorinë që shpenzon deri në 600 KWh, dhe 200 për qind për kategorinë që shpenzon rrymë mbi 600 KWh. 

Zyra e Rregullatorit për Energji në Kosovë në raportin e fundit për ndryshimin e tarifave të energjisë elektrike thotë se nuk ka nevojë për rritje të çmimit për konsumatorët që shpenzojnë deri në 600 kËh energji elektrike në muaj.

“Subvencioni i dhënë nga Qeveria e Kosovës efektivisht ndikon që tarifat e konsumatorëve si biznes të mos pësojnë rritje dhe faturat për konsumatorët shtëpiak të mos rriten për konsumin që mund të ofrohet me tarifën ekzistuese nga kapacitetet vendore në Kosovë deri në 600 kËh për muaj”, thuhet në raport,.

Në raport, ZRRE propozon që tarifa për konsumatorët me 800 kwh rrymë të shpenzuar në muaj të rritet në vlerë prej 12.31 eurosh.

Ndërsa, konsumatorët që shpenzojnë 1,000 kwh rrymë në muaj të paguajnë 24.62 euro më shumë të çmimit të rrymës.

Nëse Qeveria nuk i ndan subvencionet, ZRRE thotë se e konsideron të nevojshëm rritjen e çmimit të rrymës edhe për kategoritë tjera.

Në këtë rast, ZRRE propozon që tarifat e energjisë elektrike të ndryshohen në mënyrë që për konsumatorët biznesor të paguajnë 9 për qind më shumë.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat