Qytetarët në Prishtinë thonë se institucionet e Kosovës po respektojnë ligjet dhe Kushtetutën në veri të vendit, por që duhet të kenë kujdes për raportet me Shteteve të Bashkuara të Amerikës, pasi janë mbështetësit më të mëdhenj të lirisë dhe shtetëndërtimit tonë.
Më 30 maj, ambasadori amerikan në Kosovë, Jeffrey Hovenier e ka konfirmuar zyrtarisht se Kosova është përjashtuar nga ushtrimi “Defender Europe ’23” si masë sanksionuese pas zhvillimeve të fundit në veri të vendit.
“Jemi duke mendu se cilat do të jenë veprimet tona të mëtejshme. Mirëpo në këtë moment nuk do të gjeni shumë entuziazëm prej anës së SHBA-së të reagojë ndaj interesave tjera të Kosovës, si për shembull të angazhohemi me shtetet që s’e kanë njohur Kosovën ose që të punojmë aktivisht në trajektoren e integrimit evropian e ndërkombëtar të Kosovës”, ka thënë ai.
Ndërkohë, qytetarët thonë se jemi populli më pro-amerikan dhe se theksojnë se raportet me ShBA nuk janë prishur, por vetëm luhatur.
Qytetari nga Rahoveci, Hamdi Ajdini u shpreh se Qeveria duhet të mirëkuptohet, pasi po respekton ligjet.
Ajdini: Nëse Amerika prish raportin me Kosovën gabon rëndë
“Qeveria jonë e Kosovës është duke shkuar në bazë të Kushtetutës si rregull ata po mbrohen ashtu.... Kjo ndodh me fajin tonë shumë udhëheqësit tanë na kanë mashtruar nga fillimi. Amerika si lider që ndihmon shtetet e vogla nuk duhet me i prish raportet me neve, por për Amerikën jemi fisnik dhe i adhurojmë ashtu siç duhet”, thotë ai.
Qytetari tjetër, Izet Zhuja shprehet për KP se shqiptarët nuk heqin dorë nga Amerika.
Zhuja: Nuk heqim dorë nga Amerika
“Amerika e dinë se si shkojnë këto punë, ata shkojnë ngadalë, por me heq dorë jo Amerika nga Kosova, po as shqiptarët nuk heqin dorë nga Amerika. Strategjia afatgjatëështë që Kosova ta ketë vendin e merituar në Evrope dhe do ta ketë”, thotë ai.
Edhe Ali Izetlatifi, zanatli i vjetër në Prishtinë, ka të njëjtin mendim në lidhje me raportin e Amerikës me Kosovën. Ai thotë se Kosova asesi nuk mundet pa Amerikën.
Izetlatifi: Ne jetojmë në krah të Amerikës
“Çka të thotë Amerika amin, ku mundet Kosova pa Amerikën.....duhet me punu se nuk ka pa punu, ditë e natë me punu këtu kanë vjedh”, potencon ai.
Verzan Murgaj thotë se i gjithë populli duhet ta mbështesë vendimin e Qeverisë së Kosovës.
Murgaj: Serbët nuk duan qetësi
“Qeveria bën punën e vet, mbron vendin e vet. Politika gjithmonë ngatërrohet, shohin politiken si të privatizuar por nuk është ashtu. Shqiptarët kanë pa gjithmonë interesat e veta për atë arsye, Shqipëria është ndarë sot në dy pjesë. Serbët nuk duan qetësi, sepse paguhen nga Serbia, ata duan rrëmoj, kanë zgjedhur me i mbajt dy krahë. Amerika nuk prishet me Kosovën dhe Shqipërinë, sepse populli e don”, shpehet ai.
Xheva Kabashi thotë se Amerika ka bërë shumë për Kosovën dhe se raportet e vendit tonë me këtë shtet nuk duhet prishur asnjëherë.
Kabashi: Amerika është i zoti shtëpisë
“Raportet me Amerikën nuk duhet me u prish se menjëherë duhet me u largu nga këtu. Shumë po e kundërshtojnë Albin Kurtin, duhet me e përkrah, i gjithë populli shqiptarë me vazhdu se çka të thotë Amerika i zoti i shtëpisë. Amerika ka dhanë shumë për Kosovën, na duhet me u bo bashkë gjithmonë”, thotë ai.
Hasan Ramadani thekson se institucionet e Kosovës po nguten, por raportet e dy vendeve tona nuk do të prishen.
Ramadani: Disa politika na nuk i dimë, situata po zbutet me Amerikën
“Populli duhet me u çu në këmbë se politika e Serbisë e mban populli, qysh unë e kuptoj çështja është e mirë, na si popull nuk prishemi me Amerikën, ka vetëm luhatje. Serbia nuk ka aprovuar asnjë detyrë, por kësaj radhe mendoj se është në rregull. Amerika ka thënë që shtet mbi shtet nuk ka, na pak po ngutemi por gjendja është prapë e mirë”, thotë Ramadani.
Ndërkohë, një qytetar që dëshiroi të mbetet anonim, thotë se gjendja nuk është aspak e mirë.
Qytetari: Ne jemi popull pro-amerikan
“Në Kosovë duhet të vlerësoheni ju të rinjtë, duhet me e ditë vetë se nuk është në rregull, pjesa e shoqërisë progresive është rinia. Udhëheqësit tanë janë shumë të varur nga Amerika, ajo vetëm duhet të përfillet jo të ndjeket. Ne jemi popull pro-amerikan, këtë e ka sjell Ibrahim Rugova ku ka qenë siguria shumë më e mirë se sa sot nuk është aspak”, thotë ai.
Ndryshe, në takimin e 30 majit, ambasadori amerikan në Kosovë, Jeffrey Hovenier ka deklaruar se shpresa e tyre është që kryeministri Albin Kurti ta dëgjojë këshillën e tyre dhe të ndërmarrë menjëherë masa që ta shtendosë situatën në veri dhe të mundësojë që të kthehen të prioritetet në zbatimin e plotë të marrëveshjes që çon deri te normalizimi.
