Kandidati i propozuar për president flet para mediave

Aktuale

Kandidati i propozuar për president flet para mediave

Më: 31 gusht 2026 Në ora: 14:12
Bekim Sejdiu

Bekim Sejdiu, kandidati i propozuar për president të Republikës së Kosovës nga Lidhja Demokratike e Kosovës (LDK) dhe Lëvizja Vetëvendosje, është deklaruar para mediave, duke thënë se është nder i madh për të propozimi që të jetë president i Republikës së Kosovës.

“Gjithsesi, kjo mua më bën të ndihem i nderuar. Besimi që më kanë dhënë përfaqësuesit e dy partive është nder i madh. Unë e kam pranuar këtë propozim, ndonëse ambicia ime ka qenë në fushat akademike dhe profesionale. Por, sidoqoftë, duke qenë plotësisht i vetëdijshëm edhe për barrën dhe përgjegjësinë që sjell posti i presidentit, jam vënë në shërbim të Republikës së Kosovës dhe të qytetarëve të Kosovës, që të shërbej me devotshmëri”, tha Sejdiu para mediave.

Tutje, ai tha se pranimi nga ana e tij që të propozohej për president vjen nga dëshira për t’i shërbyer Republikës së Kosovës.

“Edhe njëherë, siç e theksova, motivi im i parë ka qenë të vihem në shërbim të Republikës së Kosovës. Kaq kam dashur ta përmbyll”, tha tutje ai.

Sejdiu nuk pranoi të marrë pyetje nga gazetarët.

comment Për komente lëvizni më poshtë
Sot mund të lexoni Shfletoni kopertinat