Deputetët e PDK-së dhe më pas ata të LDK-së lëshuan sallën. Seanca konstituive u ndërpre sërish dhe do të vazhdojë të dielën në orën 10:00.
Kuvendi i Kosovës ka mbetur sërish i pakonstituuar, pasi deputetët nuk arritën ta përfundonin zgjedhjen e pesë nënkryetarëve.
Në vazhdimin e seancës konstituive, deputeti i Lëvizjes Vetëvendosje, Ardian Gola, u zgjodh nënkryetar i Kuvendit me 101 vota për dhe një abstenim. Asnjë deputet nuk votoi kundër kandidaturës së tij.
Ndërkaq, kandidatja e Partisë Demokratike të Kosovës për nënkryetare, Vlora Çitaku, nuk i mori votat e nevojshme.
Për Çitakun votuan 44 deputetë, një ishte kundër, ndërsa 56 abstenuan.
Pas konstatimit se Çitaku nuk ishte zgjedhur, kryetarja e Kuvendit, Albulena Haxhiu, e ftoi PDK-në që ta ushtronte sërish të drejtën e saj për propozimin e kandidatit për nënkryetar. Deputetët e PDK-së, megjithatë, lëshuan sallën dhe punimet u ndërprenë.
PDK-ja paralajmëron Kushtetuesen
Seanca vazhdoi gjatë pasdites, por Haxhiu deklaroi se nuk kishte arritur të takohej me përfaqësuesit e PDK-së.
Sipas saj, PDK-ja kishte bërë të ditur se nuk do të merrte pjesë në vazhdimin e seancës dhe se për çështjen e votimit të nënkryetarit do t’i drejtohej Gjykatës Kushtetuese.
Haxhiu e ftoi përsëri PDK-në që të kthehej në sallë dhe ta propozonte kandidatin e saj. Në mungesë të deputetëve të kësaj partie, ajo paralajmëroi vazhdimin e procedurës me kandidatin e Lidhjes Demokratike të Kosovës.
Edhe LDK-ja lëshon sallën
Deputetja e LDK-së, Jehona Lushaku-Sadriu, kërkoi që para kalimit te kandidati i partisë së saj të shteroheshin të gjitha mundësitë për arritjen e një marrëveshjeje me PDK-në, si subjekti i dytë më i madh parlamentar.
Ajo paralajmëroi se LDK-ja nuk do të merrte pjesë në votim nëse procedura do të vazhdonte pa u zgjidhur fillimisht çështja e kandidatit të PDK-së.
Haxhiu deklaroi se as Rregullorja e Kuvendit dhe as aktgjykimet e Gjykatës Kushtetuese nuk e ndalojnë kalimin te kandidati i subjektit të tretë parlamentar, nëse subjekti i dytë refuzon ta propozojë kandidatin ose nuk merr pjesë në seancë.
Pas këtij qëndrimi, edhe deputetët e LDK-së lëshuan sallën.
Për shkak të rrethanave të krijuara, Haxhiu e ndërpreu seancën dhe njoftoi se vazhdimi i saj do të mbahet të dielën, më 13 shtator, në orën 10:00. Rrjedha dhe rezultatet e votimit janë konfirmuar nga Kuvendi i Kosovës.
Meqë nuk janë zgjedhur të gjithë nënkryetarët, Legjislatura XI vazhdon të mbetet e pakonstituuar.