Pas shpalljes së aktgjykimit në rastin ndaj Hashim Thaçit dhe të tjerëve për pengim të administrimit të drejtësisë, nga Qeveria e Kosovës është theksuar rëndësia e respektimit të vendimeve gjyqësore, por edhe e së drejtës për të kritikuar funksionimin e institucioneve të drejtësisë.
Në reagim, janë përsëritur rezervat ndaj Dhomave të Specializuara, veçanërisht për transparencën e procedurave, respektimin e të drejtave të palëve dhe garantimin e një gjykimi të drejtë.
Sipas reagimit, drejtësia duhet të jetë jo vetëm e bazuar në vendime, por edhe transparente dhe e besueshme.
“Sot, në Dhomat e Specializuara në Hagë, u shpall aktgjykimi në rastin ndaj Hashim Thaçit dhe të tjerëve, lidhur me akuzat për pengim të administrimit të drejtësisë.
Pavarësia e gjyqësorit dhe respektimi i vendimeve gjyqësore janë parime themelore të sundimit të ligjit. Megjithatë, kjo nuk e përjashton të drejtën dhe përgjegjësinë për të ngritur shqetësime lidhur me funksionimin e institucioneve të drejtësisë. Në këtë kuptim, kritikat dhe rezervat që kemi shprehur vazhdimisht ndaj Dhomave të Specializuara mbeten të qëndrueshme, veçanërisht sa i përket transparencës së procedurave, respektimit të të drejtave të palëve dhe garantimit të standardeve të një gjykimi të drejtë.
Besimi në drejtësi nuk ndërtohet vetëm mbi vendimet që merren, por edhe mbi mënyrën se si arrihet deri tek ato. Prandaj, angazhimi ynë për sundimin e ligjit dhe insistimi për respektimin e plotë të të drejtave dhe garancive procedurale janë pjesë e të njëjtit qëndrim parimor: drejtësia duhet jo vetëm të vihet në vend, por edhe të jetë e drejtë, transparente dhe e besueshme”, thuhet në reagimin e Qeverisë.