Presidenti i Federatës së Atletikës së Kosovës. Halil Sylejmani, po merr pjesë në Kongresin e 27-të të Federatës Atletike Evropiane, e cila po zhvillohet në Lozanë të Zvicrës.
Sylejmani tha se Kongresi përveç që është zgjedhor u diskutua edhe për shumë çështje të atletikës të Kontinentit të Vjetër po ashtu u shpreh edhe shqetësimi që Kosova nuk ka infrastrukturë të mbretëreshës së sporteve.
“Kongresi po mbahet nga data 13 tetor e deri me 17 tetor në Lozanë të Zvicrës.
Halil Sylejmani në Kongres
Është Kongresi i 27-të evropian, njëheri zgjedhor, plotësim i mandatit të kaluar për 18 muaj deri në kongresin e ardhshëm të 28-të, i cili do të mbahet në Beograd me 31 tetor të vitit 2023.
Në kongres Dobromir Karimarinov u zgjedh president i ri deri në Kongresin e ardhshëm, pas vdekjes së Hansenit, ish president.
Janë zgjedhur edhe një nënkryetar dhe dy anëtarë të bordit, kështu që u kompletua bordi”, thotë Sylejmani për gazetën kombëtare “Bota sot”.
Sylejmani u shpreh se kanë diskutuar edhe për organizimin e atletikës në Evropë.
“Kemi diskutuar për organizimin dhe zhvillimin e atletikës në Evropë e më gjerë, edhe nëpër federata, të cilat janë anëtare të federatës evropiane, ku janë treguar disa rezultate të cilat janë arritur në garat evropiane e botërore, si dhe shikimi i zhvillimit të federatave.
Kemi disa federata të cilat janë të shteteve të vogla në zhvillim, një ndër to edhe Kosova, që të kanë një përkrahje më të madhe. Buxheti i cili ka qenë për ndihmë të federatave me një shumë të konsiderueshme, pothuajse është dyfishuar për vitin e ardhshëm.
Është një lajm i mirë. Është shprehur gatishmëria për takime, shkëmbime - ide profesionale mes federatave dhe federatës evropiane, federata të cilat janë në gjirin e saj. U diskutuan edhe disa gjëra të cilat janë përditshmëri, probleme kanë qenë dhe janë, por me një angazhim të madh dhe një përgjegjësi morale e profesionale t’i tejkalojmë dhe të arrijmë rezultate, të garojmë së bashku kudo që bëjnë organizime të ndryshme”, tha Sylejmani.
Numri një i federatës, ka diskutuar edhe me drejtuesit e federatës gjermane.
“Është e mundur të organizojmë ndonjë garë në Kosovë gjatë bisedës që pata me presidentin e ri të EAF-it, gjithashtu edhe me përfaqësuesit e federatës gjermane, për të organizuar aktivitet në përkrahje të federatës evropiane, fatkeqësisht infrastruktura e mbretëreshën së sporteve nuk ekziston tek ne, të cilët janë të zhgënjyer dhe ndoshta indirekt do të intervenojë në institucionet tona”, thotë Sylejmani.
