Tetë persona të vdekur pas shpërthimit në një hotel në Havana

Bota

Tetë persona të vdekur pas shpërthimit në një hotel në Havana

Më: 6 maj 2022 Në ora: 22:06
Foto ilustrim

Të paktën tetë persona kanë vdekur dhe më shumë se 30 janë plagosur, si pasojë e një shpërthimi masiv që ka goditur një prej hoteleve më ekskluzive të Havanës në Kubë.

Shpërthimi në Hotelin Saratoga, të premten, 6 maj, duket se është shkaktuar nga një rrjedhje gazi, kanë thënë autoritetet lokale.

Ndërtesa historike pesëkatëshe ishte duke u përgatitur për rihapje pas periudhës së pandemisë së koronavirusit.

Aktualisht janë duke u kryer operacionet e kërkim-shpëtimit nën rrënoja.

Të plagosurit janë duke u trajtuar në spitalet e afërta.

Yazira de la Caridad, e cila jeton afër hotelit, ka thënë për CBS News se ka menduar që “shpërthimi ka qenë tërmet”.

Dëshmitarët kanë thënë se kanë parë tymin e zi duke dalë nga ndërtesa, pak pas shpërthimit.

Një shkollë, e cila gjendet mbrapa hotelit, nuk është dëmtuar dhe autoritetet lokale kanë konfirmuar se të gjithë fëmijët janë evakuuar.

Presidenti i Kubës, Miguel Diaz-Canel, e ka vizituar zonën rreth hotelit.

“Nuk ka qenë bombë apo sulm, ka qenë aksident fatkeq”.

Incidenti ka ndodhur teksa sektori i turizmit ka nisur të funksionojë sërish, pas periudhës dyvjeçare me pandeminë e koronavirusit.

Këtë hotel të shekullit 19 e kanë vizituar personalitete të famshme kur kanë vizituar Kubën, përfshirë artistët si Madonna, Beyonce dhe Mick Jagger./REL

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat