Reagon kreu i çiklizmit

Çiklizëm

Reagon kreu i çiklizmit

Më: 11 prill 2021 Në ora: 11:14
Reagon kreu i çiklizmit

Pas deklaratave të forta ish-president të KOKSH, Viron Bezhani, i cili ndër të tjera akuzoi edhe Skënder Anxhakun duke e quajtur një vegël të Stavri Bellos të përfshirë në veprime të jashtëligjshme, ka ardhur edhe reagimi i kreut të Çiklizmit.

Nëpërmjet një prononcimi për “Panorama Sport”, Anxhaku replikon me Bezhanin, teksa thotë se do ta çojë në prokurori për shpifje: “Bezhanin do ta denoncoj në prokurori për prishje imazhi.

Për këtë njeri unë do të bëj kallëzim penal”, shprehet fillimisht Anxhaku, i cili më pas sqaron pozicionin e tij në proceset e zhvilluara në KOKSH, ndërsa e quan Bezhanin një njeri të paaftë dhe përgjegjës për situatën ku ndodhet sporti në vend: “Unë s’kam mbledhur asnjë firmë të kundërligjshme, por kam vepruar ashtu siç thotë statuti duke respektuar rezolutën në mënyrë që sporti shqiptar të shkojë në Lojërat Olimpike. Unë i kam dal borxhit Viron Bezhanit, pasi jam ulur me të dhe i kam thënë:

‘Në qoftë se e shikon datën 23 dhjetor të jashtëligjshme, atëherë cakto datën 13 dhe të largohesh si president i nderuar’, por Vironi ngatërron këmbët e tij me këmbët e të tjerëve. Për mua Viron Bezhani është njeriu më i paaftë dhe është ai që e ka çuar sportin shqiptar në këtë pikë, me deklarata të rreme dhe mashtrime, duke akuzuar njerëzit për hajdutë.

Nëse ka prova të rregullta, le t’i dorëzojë në prokurori dhe gjykatë e të mos merret me fjalë kot poshtë e përpjetë sepse i ul imazhit të atit, sepse ai vetë si njeri nuk ka as karakter dhe as dinjitet.

Të mos vazhdojë më të merret me fjalë pazari. Unë personalisht jam i gatshëm të përballem me të në çdo moment”.

Më pas Anxhaku flet edhe për situatën e krijuar me federatat që rrezikojnë pjesëmarrjen në asamblenë zgjedhore të 17 prillit për shkak se nuk kanë plotësuar ende dokumentacionin që parashikon statuti: “Të gjitha procedurat janë bërë konform ligjit.

Asnjë federatë nuk është përjashtuar. Ato kanë mangësi në dokumentacion dhe janë njoftuar që brenda 5 ditëve t’i plotësojnë sipas rregullave të gjitha letrat”. Anxhaku e mbyll prononcimin e tij duke shprehur hapur mbështetjen për kandidatin Fidel Ylli: “Në KOKSH pritet të vijë një erë e re, me njerëz të rinj, të cilët do ta çojnë përpara sportin shqiptar. Fidel Ylli nuk ka ndërhyrë për t’u bërë president i Komitetit Olimpik, por ka ndërhyrë për ta rregulluar Komitetin Olimpik Kombëtar Shqiptar”, përfundoi prononcimin e tij kreu i Çiklizmit.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat