Silkeborg dhe Herning do të jenë nikoqire të Kampionatit Evropian të Çiklizmit Rrugor, i cili do të mbahet nga 28 shtatori deri më 3 tetor 2027.
Kampionati Evropian i Çiklizmit Rrugor për vitin 2027 do të organizohet në Danimarkë, ka njoftuar të mërkurën Unioni Evropian i Çiklizmit (UEC).
Sipas njoftimit zyrtar, garat në disiplinën e kundërkohës do të zhvillohen në qytetin e Silkeborgut, ndërsa garat rrugore do të mbahen në Herning.
Për Herningun kjo do të jetë hera e dytë që organizon Kampionatin Evropian të Çiklizmit. Në edicionin e parë të zhvilluar në këtë qytet, në vitin 2017, në garën rrugore triumfuan Alexander Kristoff i Norvegjisë dhe Marianne Vos e Holandës.
Ndërkaq, në disiplinën e kundërkohës, titujt evropianë i fituan Victor Campenaerts i Belgjikës dhe Ellen van Dijk e Holandës.
Kampionati Evropian i vitit 2027 pritet të mbledhë çiklistët më të mirë të kontinentit në garën për titujt evropianë.