Rastet e dhunës në familje po shtohen përditë e më shumë, ku zakonisht denoncueset janë gratë që vuajnë nga dhuna psikike e fizike e bashkëshortëve të tyre.
Një rast i tillë është iniciuar edhe sot, ku një 28-vjeçare ka deklaruar në Polici se është kërcënuar seriozisht nga bashkëshorti i saj.
Sinjali mëson se çifti janë të martuar që një vit dhe jetojnë bashkë në shtetin e Zvicrës, por që tash e një muaj kanë ardhur në Kosovë për pushime.
Burimet bëjnë të ditur se që të dy kanë qëndruar ndaras në familjet e tyre, teksa 28-vjeçarja ka deklaruar para hetuesve se me bashkëshortin me të cilin ka një vajzë, kanë pasur disa mosmarrëveshje, me ç’rast ai e kishte kërcënuar me fjalët “unë t’rrehi edhe pse jena në Kosovë, çikën e marr e shkojna në Zvicër ti met ktu”.
Së fundi ajo i ka gjetur atij disa mesazhe në rrjetin social Snapchat, ku sipas saj i dyshuari kishte folur me gra tjera, çka ka bërë që sërish të ketë fjalosje mes tyre dhe 32-vjeçari sërish ta kërcënojë me fjalët “e marr çikën shkoj në Zvicër, ta mys babën edhe vëllain e vogël“.
Këto fjalë ngjallën shqetësim dhe frikë te 28-vjeçarja e cila ka denoncuar rastin në Policinë e Kosovës. Njësitet policore kanë shoqëruar të dyshuarin në stacion policor për intervistim.
Me vendim të prokurorit ai do të hetohet nën dyshimet për kryerjen e veprës penale ‘Dhunë në familje’.
