Ish-këshilltari i Thaçit: Vjosa nëse do e dinte se çka është integriteti, s’do përzihej në punët e KQZ-së

Aktuale

Ish-këshilltari i Thaçit: Vjosa nëse do e dinte se çka është integriteti, s’do përzihej në punët e KQZ-së

Më: 23 janar 2021 Në ora: 21:45
Adil Behramaj

Ish-këshilltari i ish-presidentit Hashim Thaçi, Adil Behramaj, ka thënë se sikur të kishte integritet presidentja në detyrë, Vjosa Osmani, ajo do ta mbronte Komisionin Qendror të Zgjedhjeve si institucion dhe jo tutorin e saj si politikan.

Përmes një postimi në rrjetin social Facebook, Behramaj ka thënë se sikur të dinte Osmani se çfarë është integriteti, s’do përfshihej në punët e brendshme të KQZ-së, sepse është konflikt i hapur interesi meqenëse është pjesë e listës së VV-së.

Ai tutje ka thënë se Osmani ska as integritet e as guxim që ta refuzojë tutorin e saj, duke aluduar në liderin e Vetëvendosjes, Albin Kurti.

Ky reagim i tij erdhi pas video adresimit të Osmanit e cila e quajti të paprecedentë, të patolerueshme dhe të pahijshme atë se çka ndodhi në mbledhjen e KQZ-së të premten.

Osmani po ashtu tha se nëse ndodh që edhe njëherë qytetarët dhe partitë të ballafaqohen sërish me atë që ndodhi në mbledhjen e së premtes të KQZ-së, ku disa parti nuk u certifikuan, do të detyrohet të marrë të gjitha masat sipas përgjegjësive që ka.

Sikur të kishte integritet Vjosa Osmani, ajo do ta mbronte Komisionin Qendror të Zgjedhjeve si institucion dhe jo tutorin e saj si politikan. Sikur ta dinte se çfarë është integriteti, ajo nuk do të përfshihej fare si U.D. Presidente në punët e brendshme të Komisionit Qendror të Zgjedhjeve, sepse është konflikt i hapur i interesit, meqë është pjesë e listës së pacertifikuar të Lëvizjes Vetëvendosje. Sidoqoftë, meqë ajo nuk ka as integritet dhe as guxim ta refuzojë tutorin e saj, si U.D. Presidente në atë adresim do të duhej t’i inkurajonte subjektet politike që t’i ndjekin rrugët institucionale dhe jo ta kërcënonte me shkarkim bartësen e një institucioni të pavarur.

Përderisa nuk ka integritet, ajo jo vetëm që nuk mund t’ua ruajë integritetin institucioneve të pavarura, por ia ka humbur integritetin edhe Zyrës së Presidentit!

Shfaq komentet
comments powered by Disqus
Sot mund të lexoni Shfletoni kopertinat