Pesë persona janë arrestuar dje nga policia e Kosovës pasi të njëjtit po dyshohej se po përgatisnin sulme terroriste në Kosovë. Raportohet se katër nga të arrestuarit janë Ardian Qerkinaj, Mentor Bellaqa, Ergim Syla dhe Nehrudin Skenderi.
Kurse gjatë ditës së sotme pritet që Prokuroria Speciale të dërgojë kërkesën për paraburgimin e pesë të dyshuarve.
Këtë e ka konfirmuar Ekrem Lutfiu, zëdhënës në Prokurorinë Speciale të Kosovës.
Kujtojmë se nga burimet media ka mësuar se Qerkinaj jeton në lagjen “Dardania” në Pejë dhe se pas orës 13:30 është bllokuar lagjja dhe është kryer bastisja.
Gjithashtu, media ka mësuar se Qerkinaj ka qenë pjesë e grupit në Siri para disa vitesh. Por ende nuk është e qartë nëse të arrestuarit kanë lidhje me ISIS-in ose organizatat tjera terroriste.
Kurse, burimet kanë njoftuar se i dyshuari tjetër, Mentor Bellaqa, u arrestua në Prizren, rreth orës 15:00, bashkë me një të dyshuar tjetër për këtë rast.
Bellaqa ka qenë i arrestuar në vitin 2014, si një nga të dyshuarit që kanë qenë pjesë e luftës në Siri.
Prokuroria Speciale ka njoftuar se gjatë bastisjes janë gjetur materie eksplozive, armë të zjarrta dron, si dhe armë anti-tankë.
“Gjithashtu, ekziston dyshimi i arsyeshëm se të njëjtit persona kanë kryer veprat penale “Përgatitja e veprave Terroriste ose veprave penale kundër rendit Kushtetues dhe Sigurisë së Republikës së Kosovës” nga neni 138 paragrafi 1 të KPRK-së, lidhur me veprën penale “Kryerja e veprës terroriste” nga neni 129 paragrafi 1lidhur me nenin 31 të KPRK-së, si dhe veprën penale “Importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve apo materieve plasëse” nga neni 364 paragrafi 2 i KPRK-së”, thuhet nga prokuroria.
