Kandidati i Lëvizjes Vetëvendosje për kryetar të Prishtinës, Arben Vitia, ka thënë që nuk ka mundur të japë dorëheqje nga posti i ministrit të Shëndetësisë, pa e kuptuar që situata me pandeminë është vënë nën kontroll.
“Unë kur punoj një punë jam 100 përqind i angazhuar dhe situata me pandeminë – fillimisht me sigurimin e vaksinave dhe pastaj me mbajtjen në kontroll të situatës, për mua ka qenë numër një. Duke qenë e tillë dhe duke qenë i përkushtuar në maksimumin tim si një projekt i cili për mua ka qenë shumë i rëndësishëm, pasi është në pyetje shëndeti i qytetarëve. Me të gjithë koston potenciale pata marrë vendimin dhe përderisa sipas OBSH-së pandemia të quhej që është nën kontroll, nuk kam menduar që është e mirë që të lëshoj më herët postin e ministrit të Shëndetësisë dhe të merrem me fushatë”.
Tutje Vitia në Rubikon tha që edhe nëse do të kthehej sërish do të vepronte njëso, derisa theksoi që menaxhimi i Ministrisë së Shëndetësisë ka qenë sfida më e madhe me të cilën është përballur.
“Është një kosto që edhe po të kthehesha do ta bëja prap njësoj, sepse unë kam qenë duke punuar dhe në Ministrinë e Shëndetësisë, sidomos pjesa e sigurimit të vaksinave dhe rritja e rasteve me pandeminë kanë qenë një nga sfidat më të mëdha me të cilat jam përballur në të gjithë jetën time. Natyrisht, kam qenë duke punuar në maksimum që numrat të bien dhe situata me pandeminë të vihet në kontroll”, tha Vitia.
Ai theksoi që nuk ka pasë dyshim për ndonjë manipulim votash në Prishtinë.
“Është një proces jashtëzakonisht i rregullt, ashtu si shumë palë zgjedhje deri tani. Një kulturë demokratike e lartë, duke filluar qysh nga institucionet të cilat i kanë organizuar këto zgjedhje, por mbi të gjitha meritat e gjithë kësaj kulture të lartë demokratike i shkojnë qytetarëve. Jemi shembull i organizmit të zgjedhjeve dhe i demorkacisë, jo vetëm në rajon”, tha Vitia.
