Sot, janë bërë një vit prej kur ish presidenti i Kosovës, Hashim Thaçi, ish kryetari i Parlamentit Kadri Veseli dhe ish- deputeti Rexhep Selimi u transferuan për në qendrën e paraburgimit në Hagë.
Më 5 nëntor të vitit 2020, pas konfirmimit të aktakuzave ndaj tre ish-liderëve të Ushtrisë Çlirimtare të Kosovës, të njëjtit u paraqitën në selinë qendrore të EULEX-it, në Prishtinë.
Nisja e eskortës, në të cilën gjendeshin të tre liderët politikë kosovarë, u bë asokohe nga selia e EULEX.
Kurse aeroplani që i dërgoi për në Hagë nga aeroporti ushtarak i KFOR, lëshoi tokën e Kosovës pasdite.
Thaçi, Veseli, Selimi dhe ish-kryeparlamentari Jakup Krasniqi u arrestuan nga Zyra e Prokurorit të Specializuar në Hagë për dyshimet për krime lufte.
Më 4 nëntor ishte arrestuar ish-kryetari i Kuvendit të Kosovës Jakup Krasniqi, nga Specialja.
Krasniqi u arrestua nga EULEX në mëngjesit e 4 nëntorit të vitit 2020.
Pas përfundimit të operacionit ish-zëdhënësi i Ushtrisë Çlirimtare të Kosovës u arrestua dhe u bë e ditur se iu është konfirmuar aktakuza për krime të luftës.
Më vonë ai u nis drejt Hagës.
Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit ishte konfirmuar më 26 tetor 2020.
