Drejtori i Përgjithshëm i Shërbimit Spitalor Klinik e Universitar të Kosovës, Valbon Krasniqi ka thënë se pret që të rritet edhe më shumë numri i personave të infektuar me variantin Omicron të COVID-1.
Ai ka kërkuar nga qytetarët që të respektojnë masat Anti-COVID.
“Ne presim që të rriten edhe më tutje rastet me variantin Omicron, prandaj kanë qenë këto thirrjet tona të vazhdueshme për këta tre muaj sa i kishim të qetë, nga tetori, nëntori, dhjetori që ta shfrytëzojmë këtë moment të mirë dhe të vaksinohemi në numër më të madh”, ka deklaruar ai.
Ai ka thënë se pandemisë do t’i vie fundi, por kjo do të varet nga ajo se sa do të vaksinohen qytetarët.
“Çështja varet nga shumë faktorë, varet nga vet virusi, se sa po arrin të mbijetojë në mesin e njerëzimit, pra të qarkullojë në botë dhe sa njerëzimi në përgjithësi është i përgatitur, qoftë edhe me vaksinimin masiv që ndodh gjithandej vendeve të botës, qoftë edhe me respektimin e masave të cilat e zvogëlojnë mundësinë e kalimit nga njerëzit në njerëz”, ka shtuar ai.
