Ish ambasadori tregon se çfarë do të ndodhë nëse Kosova lejon mbajtjen e referendumit serb

Aktuale

Ish ambasadori tregon se çfarë do të ndodhë nëse Kosova lejon mbajtjen e referendumit serb

Nga: P.R Më: 15 janar 2022 Në ora: 11:20
Glauk Konjufca, Vjosa Osmani dhe Albin Kurti

Ish ambasadori i Shqipërisë, Islam Lauka, përmes një postimi në fcaebook ka përshëndetur vendimin e institucioneve shtetërore të Kosovës për moslejimin e mbajtjes së referendumit serb në territorin e Kosovës.

Lauka në postimin e tij ka treguar se çfarë do të ndodhë nëse Kosova lejon mbajtjen e referendumit të Serbisë në territorin e Kosovës.

“Do të thotë shumë: që në të lejojmë, me miratimin e institucioneve tona, të shkelet kushtetuta e ligjet tona, integriteti, sovraniteti dhe shtetësia e Kosovës; që ne të ripohojmë, institucionalisht, atë që ka të fiksuar preambula e kushtetutës së Serbisë- që Kosova është pjesë e territorit të saj; që ne të pranojmë të zbatojmë, jo standardet e drejta dhe demokratike për raste të tilla, por standarde të tjera, diskriminuese dhe që dëmtojnë rëndë interesat tona jetike”, shkruan ndër tjerash Lauka, përcjellë “Bota sot”.

Postimi i plotë:

Qëndrim i drejtë dhe parimor i institucioneve të Kosovës

Institucionet e Republikës së Kosovës dolën me një deklaratë, e cila bën të qartë se në territorin e Kosovës nuk do të lejohet mbajtja e referendumit të Serbisë (16.01.2022), lidhur me disa ndryshime kushtetuese.

Nga ana tjetër, edhe vendet e Quintit dolën me një deklaratë, nëpërmjet se cilës, iu kërkohet këtyre institucioneve që të lejojnë mbajtjen e referendumit serb në Kosovë, me "argumentin" se kjo "është në përputhje me praktiken e vendosur" më parë.

Një "argument" i tille është i paqëndrueshëm. Nëse qeveritë e mëparshme kanë vepruar gabim, kjo nuk do të thotë që qeveria e tanishme është e detyruar ta përsërisë e ta përjetësojë atë, aq me tepër, kur ai sjell pasoja të renda, aktuale dhe afatgjata.

Çfarë do të thotë lejimi i mbajtjes së referendumit të Serbisë në territorin e Kosovës?

Do të thotë shumë: që në të lejojmë, me miratimin e institucioneve tona, të shkelet kushtetuta e ligjet tona, integriteti, sovraniteti dhe shtetësia e Kosovës; që ne të ripohojmë, institucionalisht, atë që ka të fiksuar preambula e kushtetutës së Serbisë- që Kosova është pjesë e territorit të saj; që ne të pranojmë të zbatojmë, jo standardet e drejta dhe demokratike për raste të tilla, por standarde të tjera, diskriminuese dhe që demtojnë rëndë interesat tona jetike.

Referendumi i Serbisë zhvillohet për çështje të organizimit të brendshëm të saj (sistemi i drejtësisë). Ç'punë ka Kosova me organizimin e brendshëm të një shteti tjetër. Me çfarë të drejte Serbia kërkon të ushtrojë sovranitetin e saj mbi një shtet tjetër? A do të lejonin shtetet e Quintit që një vend tjetër të organizojë referendum në territorin e tyre?

Institucionet e Kosovës nuk janë kundër ushtrimit të së drejtës së votës të serbëve të Kosovës me shtetësi të dyfishtë, por duke e realizuar atë me poste, ose nëpërmjet Zyrës Ndërlidhëse të Serbisë në Prishtinë.

Ky është një qëndrim i drejtë, parimor dhe në përshtatje me praktikat ndërkombëtare. Është në nderin e forcave opozitare të Kosovës që kanë mbështetur këtë qëndrim. Do te ishte në nderin e institucioneve të Shqipërisë që t'i bashkohen qëndrimit të përbashkët të pozitës dhe opozitës kosovare mbi këtë çështje të mprehtë.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat