Fahrije Hoti, themeluese e Kooperativës Bujqësore ‘Krushë’ është shpallur ”Evropiania e Vitit 2022”.
Hoti ka rrëfyer për momentin kur ka humbur kontaktin me burrin e saj gjatë luftës, për fatin e të cilit ende nuk dihet.
Ajo bëri të ditur se hera e fundit kur është takuar me burrin e saj ka qenë më 25 mars të vitit 1999 rreth orës 11:00.
Gjithashtu ajo tha se flitet që ai është ekzekutuar e më pas e kanë hedhur në lumin Drini i Bardhë, mirëpo me djegien e kamionit nuk kanë mundur ta identifikojnë asnjë mostër nga vendi i ngjarjes.
“Për herë të fundit me burrin tim jam takuar me datën 25 mars të vitit 1999 diku rreth orës 11:00, mandej ka qenë rrugëtimi kur na kanë kidnapuar serbët dhe na kanë marrë gjërat me vlerë dhe sot e asaj dite nuk e di se si është vrarë dhe ku gjendet. Por, gjithmonë jemi bazuar në dëshmitarët që kanë qenë në grup me të. Por fatkeqësisht në Krushë ka qenë një krim shumë i madh, sepse pos njerëzve që janë vrarë në prezencë të familjarëve dhe kemi mbërri që dikush t’i varrosë ata dhe një grup ku fatkeqësisht ka qenë edhe burri im aty, flitet që është i ekzekutuar dhe i gjuajtur në Drin. Ndërkohë është djegur edhe kamioni, edhe eshtrat janë bartur nga Drini dhe nuk kemi mundur ta identifikojmë asnjë mostër prej vendit të ngjarjes”, tha Hoti.
Hoti po ashtu tregoi edhe momentin kur e kanë kuptuar që burri i saj nuk do të kthehet më. Sipas saj, më 22 qershor të vitit 1999 kur janë kthyer në fshat, nga krimet që kanë parë aty, e kanë kuptuar që burri i saj nuk ka mundësi të jetë i gjallë.
“Kur jemi kthyer në fshat më 22 qershor të vitit 1999, e kemi parë çfarë ka ndodhur aty dhe me burrat e atij fshati, pra vetë kjo ka lënë të kuptosh që njerëzit që kanë rënë në dorë të policisë serbe nuk ka gjasa që kanë mbijetuar. Por me thënë të drejtën edhe nga informacionet e ndryshme të njerëzve që e kanë parë burrin tim, e kemi kuptuar që ai më nuk jeton. Pra, është i vrarë, por fatkeqësisht nuk kanë arritur ta varrosin, veçse është i ngarkuar në një kamion me gjithë qytetarët e fshatit të Krushës”, deklaroi tutje Hoti.
Ndërsa, më 26 mars ai është strehuar tek një familje, ku flitet që deri në ora 18:00 të mbrëmjes ai ka qenë gjallë, e më pas është ekzekutuar nga forcat e Serbisë, tha Hoti.
“Konkretisht flitet që ai deri në ora 18:00 në mbrëmje ka qenë gjallë më 26 mars, pra është strehuar te një familje, por sipas njerëzve që kanë qenë aty, ai ka thënë se do të shkojë ta takojë babain e vet, më pas ka dalë dhe ka rënë në dorë të serbëve, dhe flitet që e kanë bërë bashkë edhe me disa njerëz tjerë dhe i kanë ekzekutuar”, deklaroi ajo.
