Deputeti i Lëvizjes Vetëvendosje, Enver Dugolli, ka thënë se paratë e Fondit të Sigurisë janë të mbikëqyrura dhe të sigurta.
“Asgjë e fshehtë nuk po mbahet për shkak se fondi është legal, fondi mbikëqyret edhe nga Banka Qendrore, domethënë të gjitha mjetet e derdhura janë në Bankën Qendrore dhe janë të sigurta”, ka thënë Dugolli për Info Magazine.
“Destinacioni i tyre dihet dhe gjithçka besoj që është në rrugën e duhur”.
Dugolli tha se fondi nuk është i fshehtë por s’është as ankand ku duhet shfaqur kush sa po jep.
“Fondi nuk është ankand publik dhe të dihet dhe të shfaqet çdo cent apo çdo njeri që jep para në këtë fond edhe të publikohet. Nuk është një lloj ankandi aty që të shfaqet se kush po jep më shumë e kush më pak, kush është i pari e kush i fundit”.
Ai tha se do të publikohen në momentin e duhur dhe se asgjë nuk ka për të fshehur.
“Ma merr mendja që dyshimet mund t’i kenë ata që ndoshta në njëfarë forme edhe po bëjnë thirrje sidomos që qytetarët të mos kontribuojnë në këtë fond”.
“Thjesht ata që nuk janë të gatshëm të kontribuojnë edhe mund të hedhin copëza dyshimi, mirëpo e vërteta është se fondi ka një qëllim shumë fisnik për çështjen e sigurisë, për mbrojtjen, për sigurinë në përgjithësi dhe institucionet e Kosovës do ta vlerësojnë momentin e duhur dhe do t’i bëjnë publike, mirëpo kontrollin e këtyre mjeteve, prejardhjen e tyre, për të gjitha këto është garantues shteti dhe Banka Qendrore dhe të gjitha donacionet janë të sigurta dhe i nënshtrohen kontrollit të ligjit mbi financat publike”.
Dugolli tha se situatat me fondet e kohës së luftës dhe këtij fondi janë të ndryshme, sepse tani Kosova është shtet dhe i ka institucionet dhe ligjet e veta.
“Janë dy situata krejtësisht të ndryshme. Atëherë kur fondet janë hapur, fondi i 3 përqindëshit, Kosova ka qenë në një pozicion krejt tjetër, ne nuk kemi pasur shtet, kemi qenë një lloj organizimi apo vetorganizimi, ndërkaq tani kemi shtetin, kemi institucionet e Kosovë, e kemi Bankën Qendrore që punon dhe vepron mbi bazën e ligjit dhe financave publike dhe asnjë situatë e përafërt nuk mund të jetë me situatën në të cilën po aludoni.”
“Gjithsesi se edhe ato fonde unë besoj dhe shpresoj që në një të ardhme shumë të shpejtë, gjithkush kush ka dyshime apo e vlerëson se duhet të ketë një transparencë dhe unë jam një adhurues i flaktë i transparencës, edhe ato duhet të bëhen publike me aq sa munden edhe aq sa kanë dokumentacion që të bëhen publike se ku janë shpenzuar”.
