Shaqir Totaj denoncon Zafir Berishën për kanosje se do ta ngreh zhag nëpër Prizren para prishjes së koalicionit

Aktuale

Shaqir Totaj denoncon Zafir Berishën për kanosje se do ta ngreh zhag nëpër Prizren para prishjes së koalicionit

Më: 26 qershor 2022 Në ora: 09:39
Shaqir Totaj, Zafir Berisha

Kryetari i komunës së Prizrenit, Shaqir Totaj, ka kërkuar ndihmë nga Policia pasi ka denoncuar se është kërcënuar përmes telefonit nga kryetari i Nismës, Zafir Berisha.

Totaj ka njoftuar Policinë se është kërcënuar nga Berisha përmes telefonit, i cili dyshohet t’i ketë thënë se do ta ngreh zhag nëpër Prizren, para se ta prishin koalicionin, për shkak të drejtorëve të zgjedhur në shkollat atje dhe “të dashurave” të tyre.

Sinjali mëson ekskluzivisht nga burimet brenda Komunës, se Prokuroria Themelore në Prizren tashmë ka nisur hetimet për këtë rast, që dyshohet se ndodhi për shkak të mosmarrëveshjeve politike.

Burimet e njëjta nga Komuna thonë për Sinjalin se Berisha i është drejtuar Totajt se do t’i sqarojnë disa çështje politike, që lidhen edhe me ‘mercenarë’ të Vetëvendosjes.

Përveç kësaj, Totaj edhe është sharë e ofenduar nga Berisha me fjalët “i pafytyrë, pis, robët ka me t’i q”), thonë burimet nga komuna.

Ai madje e ka “paralajmëruar” të parin e Prizrenit se nuk do ta lë më kaq, me pretendimet se Totaj e ka shfrytëzuar atë gjatë fushatës zgjedhore.

Lidhur me këtë rast, Gazeta Sinjali ka tentuar të marrë një konfirmim nga dy palët, por të njëjtit kanë qenë të paqasshëm.

Ndërkohë pas interesimit të Sinjalit për të marrë një konfirmim zyrtar edhe nga Policia, zëdhënësi i rajonit të Prizrenit, Vesel Gashi, ka deklaruar se nuk kanë informacione. Mirëpo burime nga komuna thonë se Drejtoria Rajonale në Prizren për t’i bërë favor Berishës, qëllimisht është duke e mbajtur rastin e fshehur dhe të izoluar nga syri i publikut dhe mediat.

Pavarësisht kësaj, Sinjali do të tentojë të marrë edhe detaje të tjera dhe do të ju mbajë të informuar.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat