Zëdhënësja e Lidhjes Demokratike të Kosovës, Jehona Lushaku-Sadriu, ka bërë të ditur se Agjencia Kundër Korrupsion ka dorëzuar sot kallëzim penal ndaj ambasadorit të Kosovës në Kroaci, Martin Berishaj.
Ajo ka thënë se LDK-ja kqrkon shkarkimin e Berishajt dhe sqarim të secilit zyrtar publik që kishte marrë në mbrojtje Berishajn.
“Agjencia Anti-Korrupsion sot ka dorëzuar përfundimisht kallëzim penal ndaj ambasadorit të Kosovës në Kroaci, Martin Berishaj; mbi faktet shokuese të bëra publike muaj me parë. Kallëzimi penal është përfundim logjik ndaj një skandali të fshehjes së të hyrave prej gjysmë milioni. Hapja e hetimeve, por edhe përfshirja e një ambasadori të Kosovës në skandale ndërkombëtare financiare, dëmtojnë rëndë imazhin e vendit tonë, rrjedhimisht e bëjnë të pamundur përfaqësimin e shtetit. Prandaj, deri në përfundimin e rastit në fjalë, kërkojmë shkarkimin e Abasadorit Martin Berishaj; siç dhe kërkojmë sqarimin e secilit zyrtar publik, që në fillet e shpërthimit të këtij skandali, kishin garantuar dhe marrë në mbrojtje ambasadorin në fjalë”, ka shkruar në Lushaku-Sadriu në Facebook.
Deri më tani Agjencia Anti-Korrupsion nuk është deklaruar rreth këtij kallëzimi, ndërkohë që KosovaPress po vazhdon përpjekjet për të marrë një përgjigje nga kjo e fundit.
