Prokuroria Themelore e Ferizajt gjatë së premtes ka ndërmarrë aksion për sekuestrimin e objekteve në Brezovicë.
U raportua pak më parë se janë sekuestruar hoteli i Veton Surroit dhe hoteli i Sabit Gecit.
Në mesin e objekteve të sekuestruara janë edhe vila e ish-kryetarit të Shtërpcës, Bratislav Nikoliq, i cili tashmë është në mbajtje.
Poashtu është sekuestruar edhe vila e Ruzhdi Aliut dhe objekti i Riad Hasanit.
Riad Hasani është pronar i kompanisë “RIMIDA” që njihet si barnatore bujqësore me seli në Prishtinë.
Në Agjencionin për Regjistrimin e Bizneseve, Hasani ka edhe dy firma me të njëjtin emër.
“Rimida Online SH.P.K”, që del të jetë nën pronësinë e gruas së tij, Nora Islami Hasani dhe si aktivitete primare ka tregtinë me pakicë me porosi nga shtëpia nëpërmjet postës ose internetit. Dhe në N.T.
Emir i tij sipas të dhënave në ARBK, figuron si pronar edhe në biznesin “Arena Sport SH.P.K.” me seli në Prishtinë, që ka një shtrirje të gjerë në tërë komunat e Kosovës. Vetëm në komunën e Podujevës ka gjithsej shtatë pika të këtij biznesi dhe në Prishtinë gjithsej nëntë pika.
Ky biznes, si aktivitet primar ka lojërat e fatit dhe basteve, si dhe kultivimin e perimeve dhe rritjen e gjedheve për qumësht.
Edhe kompania “Arena Construction SH.P.K”, me seli në Prishtinë mban pronësinë e biznesmenit Hasani.
Ky biznes ka për aktivitet primar Ndërtimin e objekteve banesore dhe jo banesore, rrugëve dhe autostradave. “Motel Paris SH.P.K.” me seli në Fushë Kosovë është biznesi tjetër që Rijad Hasani e ka në bashkë -ortakëri me Blerim Imerin biznesmen nga Shkupi, që vepron në Kosovë
Poashtu janë sekuestruar edhe vila dhe objekti i Blerim Imerit pronar i “Rezonancës".
Në këtë aksion të prokurorisë janë sekuestruar edhe dy vila të biznesmenit Fatmir Grainca pronar i kompanisë “Hit Imperial”.
Biznesmeni ferizajas ka një aktakuzë të hapur pikërisht për degradim të ambientit në Parkun Kombëtar “Sharri”.
“Fatmir Grainca akuzohet nga prokuroria se gjatë vitit 2018, në zonën turistike të Parkut Kombëtar “Sharri” në Brezovicë, Komuna e Shtërpcës, ka degraduar mjedisin duke rrezikuar pasuritë e mbrojtura natyrore, në atë mënyrë që si pronar i parcelës kadastrale numër 5602/1ZK Shtërpcë, përmes ndërmarrjes ndërtimore “Dushi” ka filluar ndërtimin e objektit banesor B+P+NK, në zonën e tretë të parkut, në afërsi të lumit, kurse skaji tjetër në afërsi prej 1 metër, i cili objekt është në kundërshtim me Planin Hapësinor të Parkut Kombëtar “Sharri”, Ligjin për Mbrojtjen e Mjedisit dhe Ligjin për Ujërat e Kosovës”, shkruan në aktakuzë.
Akti i akuzës ndaj tij dhe disa personave të tjerë ishte ngritur nga prokurori ferizajas, Rasim Maloku, më 16 nëntor, të vitit 2020.
Grainca është i përfshirë në rastin për korrupsion, ndotje, degradim e shkatërrim të mjedisit në vargmalet e Sharrit, konkretisht në Brezovicë.
Media mëson nga burime se në aksionin e sotëm janë sekuestruar gjithsej 30 vila dhe tri objekte.
Ish-Kryetari i Komunës së Shtërpcës, Bratislav Nikoliq është sërish i përfshirë në dosjen e prokurorisë pas arrestimeve të fundit që u kryen për rastin e njohur si “Brezovica”.
Dosja përshkruan para të shumta që pronarët e hoteleve në Brezovicë dyshohet se i kanë dhënë ryshfet për kryetarin e Komunës së Shtërpcës, Bratislav Nikoliq, përmes personave të tjerë.
Këto para u prokuroria pretendon se u dhanë që të lejohej ndërtimi i objekteve e hoteleve në zonën e Brezovicës.
