Presidenti i Këshillit Evropian, Charles Michel ka deklaruar se i takon Këshillit të Evropës që të trajtojë çështjen e aplikimit të Kosovës për statusin e vendit kandidat.
Ai pas përmbylljes së punimeve të samitit të sotëm të mbajtur në Tiranë, ka thënë se e ardhmja e fëmijëve do të jetë më e sigurt dhe më e begatë me Ballkanin Perëndimor brenda BE-së. Ndërkaq, presidentja e Komisionit Evropian, Ursula von der Leyen ka thënë se janë ndarë 1 miliard euro për shtetet e Ballkanit Perëndimor për të përballur me krizën energjetike.
Pas samitit BE-Ballkani Perëndimor, kryeministri Edi Rama ka mbajtur konferencë të përbashkët me presidenten e Komisionit Evropian, Ursula von der Leyen dhe presidentin e Këshillit Evropian, Charles Michel.
Presidentja e KE-së ka thënë se samiti i mbajtur sot në Tiranë është mesazh i qartë i të qenit së bashku. Ajo i është përgjigjur edhe kryeministrit Rama, i cili tha se janë gati të japin jetën për mikun.
“Ne nuk duam jetën, ne duam të jetojmë jetët tona, ta jetojmë jetën së bashku. Faleminderit shumë për këtë samit të mrekullueshëm, të shkëlqyer. Një mesazh shumë i qartë nga ky samit i të qenit së bashku, për ato çështje të cilat janë sfida që përballemi ne së bashku të gjithë. Një samit partneriteti me biseda të thella, të qartë, të drejtpërdrejta e të sinqerta. Natyrisht, që ne diskutuam shumë tema, do të flas për disa prej tyre. Një temë madhore është që ne dëshirojmë të përballemi me sfida që vijnë jo vetëm nga kjo luftë e tmerrshme që ka nisur Rusia në Ukrainë, por edhe një nga pasojat që ka të bëjë me sektorin e energjisë. Për ne është e rëndësishme që së bashku me miqtë tanë nga Ballkani Perëndimor, ne të përballemi me këtë sfidë së bashku, në mënyrë të këtillë ku ne reflektojmë gjithçka që do të bëjmë ne në Bashkimin Evropian, reflektohet edhe këtu në Ballkanin Perëndimor.
Fakti që familja dhe bizneset këtu do të kalojnë vështirësi po aq sa kalojmë edhe ne, për ne është shumë me rëndësi që të japim zgjidhje të njëjta. Andaj, kjo paketë prej 1 miliard eurove, për mbështetje për sektorin e energjisë është ndarë në dy pjesë, 500 milionë euro mbështetja e drejtpërdrejtë buxhetore, e cila jep mundësi që në formë të shënjestruar t’i jepet ndihmë familjeve në nevojë, si dhe bizneseve në nevojë. Ndërsa, pjesa e dytë 500 milionë tjera, janë mbështetje për infrastrukturën, në mënyrë që të bëhet e pamundura të bëhen investimet për energjinë e së ardhmes”, ka deklaruar ajo.
Para mediave, Von der Leyen ka folur edhe për mbështetjen që është e dedikuar për Shqipërinë, ku theksoi se pjesë e projekteve është edhe ndërtimi i një centrali.
“35 milionë është mbështetje e drejtpërdrejtë buxhetore brenda kësaj pakete prej 500 milionësh. Ka një sërë projektesh të ndryshme që tashmë po financohen me 500 milionëshin tjetër, besoj gjashtë projektet që miratuam dje janë 120 milionë. Unë e di që disa prej projekteve janë për shembull një central i madh fotvaltaik këtu, por nuk i mbaj mend gjithë detajet tjera”, ka deklaruar ajo.
Presidentja e Komisionit Evropian ka përsëritur mbështetjen e procesit të zgjerimit dhe integrimit të rajonit.
“Më lejoni të ju siguroj sërish që tërësisht dhe me zemër mbështesim procesin e zgjerimit dhe të integrimit të rajonit. Këtë vit ne kemi parë shumë ecuri, përparime, progres. Kemi pasur edhe konferencën e përbashkët ndërqeveritare me Shqipërinë dhe Maqedoninë e Veriut, pra shikojmë një lëvizje të re në të gjithë këtë proces. Ka qenë vërtet një hap historik për hapjen e negociatave. Tashmë ka filluar procesi i vlerësimit analitik të legjislacionit dhe kjo punë po vijon. Ne, komisioni, kemi rekomanduar dhënien e statusit kandidat Bosnjë Hercegovinës, natyrisht me kusht që të merren disa hapa dhe presim që të merret edhe një vendim nga Këshilli në lidhje me këtë çështje. Përveç kësaj ecurie që ne shikojmë, natyrisht që ka edhe një çështje të rëndësishme, e cila ka të bëjë me integrimin ekonomik, pra tregun e përbashkët rajonal”, ka shtuar ajo.
Ajo tha se në samitin e sotëm kanë diskutuar edhe për çështjen e migracionit, ku potencoi se ka interes për të bashkëpunuar në këto aspekte. Pas samitit, Von der Leyen ka deklaruar se komisioni ka propozuar një plan veprimi për të rritur bashkëpunimin reciprok.
Presidenti i Këshillit Evropian, Charles Michel është pyetur në lidhje me aplikimin e Kosovës për statusin e vendit kandidat në Bashkimin Evropian.
“Dy pika shkurtimisht, unë konfirmoj që ky informacion u shpall nga presidenca e Kosovës, elementi i parë. Dhe elementi i dytë i takon Këshillit Evropian që të trajtojë këtë temë dhe të shikojë se çfarë vijimi do t’i jepet kësaj iniciative”, ka deklaruar ai.
Michel ka shtuar se është historike mbajtja e samitit në Tiranë, meqë organizohet për herë të parë në rajonin e Ballkanit Perëndimor.
“Kjo është një mbledhje historike gjatë së cilës ne shkruam historinë. Shkruajmë historinë, sepse për herë të parë kjo mbledhje u organizua në rajonin e Ballkanit Perëndimor. Për herë të parë, Bashkimi Evropian dhe liderët e Ballkanit janë rreth së njëjtës tryezë, në vijim të takimit që ka ndodhur në Brdo, në Slloveni dhe takimit në Bruksel gjatë samitit që u zhvilluan në muajin korrik. Kjo mbledhje e sotme është deklarata që shoqëron punimet tuaja, është e rëndësishme sepse përmban hapa shtesë në rrugën e integrimit. Besoj thellësisht se e ardhmja e fëmijëve tanë do të jetë më e sigurt dhe më e begatë me Ballkanin Perëndimor brenda BE-së. Dhe kjo bindje e përbashkët na bashkon për të favorizuar përmes projekteve konkrete dhe të prekshme këtë përafrim me Ballkanin Perëndimor. Të gjithë kemi detyrat tona për të realizuar, ka pritshmëri me qëllim që reforma në shtetin e së drejtës, reforma në drejtësi, lufta e korrupsionit të avancojë”, ka thënë Michel.
Po ashtu, ai shtoi se Bashkimi Evropian duhet të përforcojë kapacitetin e tij për të përforcuar tregun e përbashkët.
Presidenti i Këshillit të Evropës theksoi se temë sfiduese mbetet çështja e migracionit.
“Ne përballemi sërish me vështirësi në lidhje me këtë dhe gjithashtu në rritjen e shifrave. Ky bashkëpunim konkret operativ në Ballkanin Perëndimor është thelbësor për të gjithë ne. Ne patëm mundësi që të shënojmë një lloj progresi duke harmonizuar politikën e vizave që është një hap konkret në drejtimin e duhur. Ne e dimë që duhet të merren vendime shtesë dhe natyrisht që duhet të bëjmë progres të mëtejshëm duke menaxhuar së bashku këtë situatë. Është një mbledhje shumë e rëndësishme, dëshiroj të falënderoj edhe një herë Edi Ramën, të gjithë partnerët e Ballkanit Perëndimor, sepse pati sot shumë respekt dhe shumë besim. Jemi të kthjelltë për momentin që jetojmë, për brezat e ardhshëm, janë momente shumë tronditëse, tronditje klimatike, numerike. Kjo lufta që shkaktoi këto pasoja, çështja është të dimë në cilën shoqëri do të jetojmë nesër, a duam lirinë, a duam që parimet demokratike të garantojnë jetën e çdo qenie njerëzore apo duam një model tjetër”, ka thënë Michel.
Samiti i mbajtur gjatë ditës në Tiranë ka bërë bashkë liderë të Bashkimit Evropian dhe të Ballkanit Perëndimor. Aty është nënshkruar marrëveshja për tarifat roaming mes vendeve të Ballkanit Perëndimor dhe Bashkimit Evropian, e cila cakton uljen e tarifave në tetorin e vitit të ardhshëm.
