Tashmë u bën dy javë prej që u nda nga ne ish-ushtari i Ushtrisë Çlirimtare të Kosovës, Bastri Fazliu, i cili është varrosur në varrezat e fshatit Peran të Podujevës.
Bastriu qysh si 18 vjeçar u rreshtua në radhët e lavdishme të Ushtrisë Çlirimtare të Kosovës.
Ai ishte ushtari më i ri për nga mosha i Togut “Ulpiana 34” në Brigadën 152 “Shaban Shala”, në Zonën Operative të Llapit.
Bastri Fazliu rrjedh nga një familje patriotike që vjen nga brez kufitar Silovicë.
Ai ende pa i mbushur 18 vjet i është bashkuar Ushtrisë Çlirimtare të Kosovës. Roli i tij ishte shumë i rëndësishëm, pasi ishte kyçur me gjithë familje në UÇK.
Nëna e tij Adilja e ushqeu Batalionin e Brigadës 152 “Zahir Pajaziti”, gjithashtu edhe babai i tij Shabani ishte pjesë e UÇK-së.
Bastriu ishte shembull i një luftëtari të vërtetë lirie.
Kontributi i tij në betejat e Zonës, e në veçanti në betejat e Peranit dhe të Katunishtës është i papërshkrueshëm.
Përveç kontributit në vijën e frontit, Bastriu kontribuoi edhe në sigurimin e bazës për pjesëtarët e togut, duke liruar shtëpinë e tij për këtë qëllim, sikur që kontribuoi edhe në mbështetjen logjistike për nevojat e ushtarëve.
Me një fjalë, ai ishte i përkushtuar me gjithë qenien e tij për lirinë e Kosovës.
Fundi i luftës e gjeti në vijën frontale në Majac.
Me përfundimin e luftës, Bastriu jetoi në mënyrë modeste, por gjithnjë me dinjitet.
Ishte prind, familjar e shok shembull, punoi me nder, ndërsa vdiq i ri në Zarë të Kroacicë në moshën 42 vjeçare pas një infarkti.
Jeta dhe vepra e Bastriut na obligon të gjithë neve, secilin bashkëluftëtar e qytetar të Llapit, që ta kujtojmë me respekt e krenari.
Bastriu do të kujtohet gjithmonë si një ushtar i urtë dhe besnik.