Nënkryetari i Aleancës për Ardhmërinë e Kosovës, Ahmet Isufi, tha se dy partitë tjera opozitare në Kuvendin e Kosovës nuk kanë gatishmëri që ta votojnë mocionin e mosbesimit ndaj qeverisë dhe ta dërgojnë vendin në zgjedhje të parakohshme.
Isufi tha se gatishmëria e partisë në qeveri që ta votoj shpërndarjen e Kuvendit është e gabuar sipas AAK-së, andaj u shpreh se partia që e përfaqëson nuk e përkrah një ide të tillë.
“Ne e kemi bërë mocionin i cili ka qenë si iniciativë e Aleancës që partitë opozitare të ofrohen dhe ta sjellin në Kuvend mundësinë e dorëheqjes por nuk ka gatishmëri nga dy partitë tjera opozitare duke e mbajtur një qeveri e cila po shkakton dëm vendi”, tha Isufi.
I pyetur nëse do të mund të bëheshin votat e mjaftueshme për ta shkarkuar qeverinë nga opozita, Isufi i kërkoi partive opozitare në Kuvend që të shkojnë dhe ta përkrahin këtë mocion për ta parë nëse mund të shkarkohet ose jo.
“Opozita e ka për detyrë të iniciojë çështje që e favorizojnë partitë opozitare ose interesin e Kosovës e që është më i rëndësishmi për neve, andaj derisa nuk tentohet nuk dihet a mund të shkarkohet apo jo por nuk ka pas gatishmëri për një mocion të tillë. AAK ka kërkuar një mocion të tillë dhe nëse dojnë ata, le të vijnë në Kuvend, t’i ofrojnë votat, ta shkarkojmë qeverinë dhe shihet iniciativa dhe vullneti jonë, por siç po shihet nuk ka gatishmëri të partive politike që do t’i bashkonin votat dhe ta dërgonin vendin në zgjedhje”, deklaroi ai.
Ndërsa, kërkesën e Vetëvendosjes që të shkohet në zgjedhje përmes shpërndarjes së Kuvendit, Isufi e quajti të dëmshme pasi sipas tij kjo qeveri duhet t’i merr përgjegjësitë për dëmet që i ka shkaktuar vendit.
“Partia në qeverisje e cila ka shfaqur gatishmërinë për shpërndarje të Kuvendit dhe kësaj ideje iu ka bashkëngjit edhe PKD besojmë se është e gabuar për shkak se përgjegjësinë duhet ta marrë qeveria dhe jo Kuvendi sepse kemi të bëjmë me stagnim të zhvillimeve në Kosovë, izolim të Kosovës, sanksione që iu kanë bërë vendit dhe po shihet që të gjitha shtresat në Kosovë janë të cenuara nga kjo qeveri e dobët. Dhe, nëse kemi një qeverisje të vendit e cila është më jotransparentja deri më tani si dhe ka stagnuar në zhvillimin e infrastrukturës, ekonomisë dhe përmirësimin e jetës së qytetarëve, kemi ngritje enorme të çmimeve, inflacion të madh dhe nuk kemi ngritje të pagave kemi degradim të vendit, edhe në marrëdhëniet ndërkombëtare kemi tërheqje prapa sa i përket angazhimit të qeverisë së Kosovës dhe trysni më të madhe të faktorit ndërkombëtarë që Kosova të ecë në integrimet që duhet, atëherë krejt kjo tregon se sa më shpet vendi duhet të shkoj në zgjedhje duke u dorëhequr qeveria”, tha Isufi.
