Presidenti i Këshillit Evropian, Antonio Costa, ka qëndruar sot për vizitë në Prishtinë në kuadër të turneut të tij nëpër vendet e Ballkanit Perëndimor.
Në vizitën e tij të parë pas marrjes së detyrës, zyrtari i lartë evropian është takuar me presidenten Vjosa Osmani.
Osmani në konferencën e përbashkët për media me presidentin Costa theksoi se tani është koha të ndërmerren hapa konkretë për integrimin e Kosovës në BE, heqjen e masave ndëshkuese, teksa përmendi edhe nevojën që aplikimi i Kosovës për marrjen e statusit të vendit kandidat të shqyrtohet sa më parë.
Osmani: Kosovës t’i largohen masat ndëshkuese
“Është koha që kjo të reflektohet përtej fjalëve dhe me hapa konkretë drejt integrimit të shtetit tonë në BE. Presim që në udhëheqjen tuaj të bëjmë këto hapa përpara dhe Kosovës t’i hapet rruga drejt BE-së. Në mënyrë që kjo të ndodhë, shpresojmë që shtetet anëtare të pajtohen që të hiqen masat e padrejta ndaj Kosovës, të cilat po dëmtojnë qytetarët, interesat dhe projektet që lidhen me vetë integrimin në BE. Këtë verë bëhen dy vjet prej kur janë vendosur masat dhe çdo minutë më shumë me masat në fuqi është një minutë më shumë padrejtësie dhe larg jetësimit të ëndrrës evropiane të qytetarëve tanë, si dhe një vonesë më shumë e projektit të zgjerimit të bazuar në merita. Po ashtu, është koha përfundimtare që të trajtohet aplikimi ynë për anëtarësim, i dorëzuar që në dhjetor të vitit 2022. Ky dokument të mos mbetet një dokument i arkivuar dhe shpresojmë që ky aplikim të trajtohet me prioritet”, tha ajo.
Largimin e masave ndëshkuese e përmendi edhe presidenti i Këshillit Evropian, Antonio Costa.
Costa: Masat ndërlidhen me nevojën për de-eskalim të situatës në veri
“Masat ndërlidhen me nevojën për të de-eskaluar tensionet në rajon dhe në veri. Ajo që unë dëshiroj është që sa më shpejt të kemi de-eskalim dhe të ecim përpara për t’i larguar masat. Shpresoj që ngjarjet e fundit nuk paraqesin një trend të ri, por janë një përjashtim nga rregulli, duke qenë se jeni të përfshirë dhe të angazhuar plotësisht në këtë rrugëtim evropian”, tha ai.
Në lidhje me këtë, presidentja Osmani tha se Kosova i ka përmbushur të gjitha kërkesat e BE-së për de-eskalim të situatës në veri, përfshirë edhe mbajtjen e zgjedhjeve të reja lokale.
Osmani: Kosova ka përmbushur kërkesat e BE-së për de-eskalim të situatës në veri
“Të tri këto kërkesa të BE-së, që kanë qenë të përfshira në marrëveshjen e Bratislavës, janë plotësuar nga Kosova që një kohë të gjatë. Kjo është arsyeja pse ish-përfaqësuesi i lartë Borrell ka rekomanduar në verën e vitit të kaluar që masat të hiqen në tërësi. Ky ka qenë rekomandimi i Borrell dhe së shpejti bëhet një vit që ai ka konstatuar se Kosova i ka plotësuar të gjitha kriteret e vendosura. Ne e kuptojmë se konsensusi në BE është kompleks, dhe ne si Kosovë duhet të angazhohemi që të punojmë me secilin shtet veç e veç, në mënyrë që të mos ketë hezitim”, tha ajo.
Nga ana tjetër, presidenti Costa kërkoi përparim të prekshëm në zbatimin e obligimeve në dialogun Kosovë-Serbi si një element kyç për rrugëtimin evropian dhe të ardhmen e përbashkët në familjen e madhe evropiane.
Costa: Kosova duhet të përmbushë obligimet në dialog
“E mirëpres punën tuaj për dialogun Beograd-Prishtinë. Siç e dini, është gjithashtu thelbësore të bëhet përparim i vërtetë dhe i prekshëm në këtë dialog dhe të normalizohen marrëdhëniet midis Kosovës dhe Serbisë. Kjo do të ishte në të mirë të rrugës suaj evropiane dhe, në fund të fundit, në të mirë të jetëve të qytetarëve të Kosovës. Vendi i Kosovës është në familjen e Bashkimit Evropian, por kjo kërkon gjithashtu që ju të përmbushni zotimet tuaja. Me përfaqësuesin e ri të posaçëm të BE-së, Peter Sorensen, është koha të shfrytëzoni këtë mundësi dhe të ecni përpara”, tha ai.
Në këtë kontekst, presidentja Osmani shprehu shpresën se emërimi i Peter Sorensen si përfaqësues i ri i BE-së për dialogun do të sjellë një frymë të re dhe qasje të balancuar në proces.
Osmani: Shpresojmë që në dialog të ketë një qasje të balancuar
“Me emërimin e emisarit të ri për dialog shpresojmë që të sjellë një frymë të re dhe qasje të balancuar, si dhe trajtim të barabartë të dy palëve në këtë proces. Në Kosovë jemi të bindur se fokusi kryesor i këtij procesi duhet të jetë njohja reciproke mes Kosovës dhe Serbisë, pasi përndryshe nuk do të kontribuonte për paqe dhe stabilitet afatgjatë. Megjithatë, më duhet të përmend se vizita e fundit e Vuçiq në Moskë nuk mund të shihet ndryshe veçse si një akt i qartë politik që sfidon stabilitetin e Evropës. Nëse një vend pretendues për anëtarësim sillet kështu dhe nuk përballet me asnjë masë, atëherë lind pyetja se çfarë mesazhi po i jepet rajonit tonë”, theksoi Osmani.
Presidenti Costa foli edhe për Planin e Rritjes së BE-së për Ballkanin Perëndimor, duke thënë se është një mundësi e madhe për rajonin. Ai nënvizoi se është thelbësore të vazhdohet puna për zbatimin e një agjende ambicioze reformash, në mënyrë që Kosova të mund të përfitojë plotësisht prej saj.
