Kurti në takim me Costa shpreh përkushtimin e Kosovës për aderim në BE

Aktuale

Kurti në takim me Costa shpreh përkushtimin e Kosovës për aderim në BE

Më: 14 maj 2025 Në ora: 21:25
Pamje nga takimi

Kryeministri në detyrë Albin Kurti gjatë një takimi me presidentin e Këshillit Evropian Antonio Costa, ka kërkuar nga ky i fundit një rol më aktiv për statusin të vendit kandidat, duke përkujtuar se kanë kaluar gati dy vjet e gjysmë që nga aplikimi i Kosovës për anëtarësim në Bashkimin Evropian.

Kurti tha se Kosova është plotësisht të përkushtuar për t'u bërë vend anëtar i Bashkimit Evropian, duke përkujtuar progresin e arritur në sundimin e ligjit, luftimin e korrupsionit, rritjen më të shpejtë ekonomike në rajon, si dhe është vendi i parë që ka dorëzuar në kohë agjendën e reformave të Planit të Rritjes.

“Kosova ka bërë progres në plotësimin e reformave, siç dëshmohet në raportet e Progresit të Bashkimit Evropian”, tha Kurti.

Ai gjithashtu, kërkoi heqjen e plotë dhe të menjëhershme të masave ndëshkuese të Bashkimit Evropian ndaj Kosovës.

Gjatë diskutimit u bisedua edhe mbi sigurinë rajonale ku kryeministri në detyrë përmendi kërcënimet për rajonin që vijnë nga Serbia dhe lidhjet e saj të vazhdueshme me Rusinë, si dhe kërkoi që autori i sulmit terrorist në Banjska, Milan Radoiçiq, t’iu dorëzohet institucioneve të drejtësisë së Kosovës.

Në takim, Kurti gjithashtu ngriti shqetësimin për shkeljen e të drejtave të shqiptarëve në Luginën e Preshevës, të cilët janë të nën-përfaqësuar në institucionet publike, diskriminohen në punësim dhe të drejtat e tyre shpërfillen në mënyrë të vazhdueshme nga Beogradi.

Antonio Costa po qëndron për vizitë njëditore në Kosovë si pjesë e një turneu nëpër vendet e Ballkanit Perëndimor, për herë të parë pas marrjes së detyrës. Ai gjatë vizitës në vendin tonë është takuar edhe me të parën e shtetit Vjosa Osmani. Zyrtari i lartë evropian do të vazhdojë turneun e vizitës në Maqedoninë e Veriut dhe Shqipëri.

comment Për komente lëvizni më poshtë
Sot mund të lexoni Shfletoni kopertinat