Gëzim Mekuli kritikë deputetëve të VV-së: Heshtja juaj është bashkëfajësi!

Aktuale

Gëzim Mekuli kritikë deputetëve të VV-së: Heshtja juaj është bashkëfajësi!

Nga: A.SH Më: 8 korrik 2025 Në ora: 16:13
Foto ilustrim

Publicisti Gëzim Mekuli ka kritikuar ashpër deputetët e Lëvizjes Vetëvendosje për pasivitetin e tyre në skenën publike dhe mediatike.

Sipas tij, në kohën kur dezinformimi dhe shpifjet po gërryejnë themelet e demokracisë në Kosovë, heshtja e shumicës së deputetëve është e pafalshme.

“Vetëm 6-7 janë aktivë, por kjo është shumë pak”, thotë ai, duke shtuar se sulmet ndaj kryeministrit Kurti janë në fakt sulme ndaj vetë Republikës.

Mekuli i bën thirrje deputetëve të jenë më të zëshëm dhe më të pranishëm në publik, pasi mungesa e komunikimit, sipas tij, përbën dështim politik dhe institucional.

Shkrimi i plotë:

Deputetë të Vetëvendosjes, ku jeni?

Sot kur dezinformimi, shpifjet, lajmi i rremë, dhe propaganda e egër po gërryejnë themelet e mirëbesimit publik në Kosovë, është e pafalshme, është gabim i madh që 46 deputetë të Lëvizjes Vetëvendosje të qëndrojnë pasivë, thuajse të padukshëm në hapësirat mediatike. Ndoshta 6 a 7 janë aktiv, por këta janë pak, shumë, shumë pak!

Sot, kur sulmet ndaj Kryeministrit Kurti janë bërë të përditshme, nuk është vetëm figura e tij që po sulmohet; është vetë Republika e Kosovës që po vihet në pikëpyetje. Në këtë betejë të poshtër mediatike, heshtja ndaj lajmeve te rreme dhe rrenës nuk është neutralitet, është bashkëfajësi.

Komunikimi publik është një shtyllë thelbësore e funksionimit demokratik. Në mungesë të tij, hapësira mbushet me zhurmën e rremë të opozitës dhe me një diskurs publik që të vërtetën e paraqet si rrenë, e rrenën si fakt.

Të nderuar lexues,

Fakte të shumta tregojnë se qeveritë që nuk komunikojnë në mënyrë të vazhdueshme me qytetarët, lënë terren të lirë për manipulime.

Vetë Organizata Botërore e Shëndetësisë gjatë pandemisë theksoi se "infodemia", përhapja masive e lajmeve të rreme, ishte po aq e rrezikshme sa vetë virusi. Në Kosovë, ky fenomen po ndodh me demokracinë: shpifjet po qarkullojnë më shpejt se faktet.

Ndër tjerash, kjo është përgjegjësi e drejtpërdrejtë edhe e deputetëve të Vetëvendosjes. Nuk mjafton të votojnë në Kuvend apo të dalësh një herë në muaj në ndonjë studio televizive sall për adet.

Ju duhet të jeni aktivë çdo ditë; në televizion, në radio, në rrjete sociale, në kontakt të drejtpërdrejtë me qytetarët. Të sqaroni, të informoni, të ballafaqoheni me gënjeshtrat dhe manipulimin. Pse heshtni? Pse nuk mbroji punën e mirë të Qeverisë që përfaqësoni?

Moskomunikimi i juaj me publikun është dështim politik, institucional dhe qytetar.

Sepse aty ku rrena, manipulimi dhe shpifja paraqitet si "fakt" dhe "realitet", dhe realiteti e fakti si "gënjeshtër", nuk kemi vetëm krizë komunikimi, por krizë të vetë demokracisë dhe të shoqërisë në përgjithësi. PIKË!

comment Për komente lëvizni më poshtë
Sot mund të lexoni Shfletoni kopertinat