Zafir Berisha ka njoftuar se do të garojë në zgjedhjet e 28 dhjetorit, duke u rreshtuar përkrah Aleancës për Ardhmërinë e Kosovës dhe Ramush Haradinajt. Ai ka deklaruar se synon të “luftojë të keqen që e ka kapluar Kosovën”, duke e quajtur Vetëvendosjen “sekt politik që ka mashtruar qytetarët”.
Berisha njëkohësisht ka sulmuar ashpër PDK-në, duke e cilësuar kandidatin Bedri Hamza si “kandidat kukull” të dirigjuar nga grupe brenda partisë. Ai tha se nuk i bashkohet një “loje politike me figurina pa vlerë”.
“S’jam në politikë për skenarë të dështuar, por për Kosovën”, ka përmbyllur ai.
Postimi i plotë:
Të nderuar miq, bashkëpunëtor nga BDP dhe qytetarë të respektuar,
Në betejën politike për zgjedhjet e 28 dhjetorit po hyj me motivin që të jap kontributin tim me gjithë mundësitë që kam, për të luftuar të keqen që e ka kapluar Kosovën, sektin politik të Albinit, i cili e ka çorientuar shtetin dhe ka mashtruar qytetarët me premtime boshe.
Me Ramush Haradinajn na lidh e kaluara për liri, por edhe përgjegjësia që kemi ndaj vendit nga i cili nuk heqim dorë.
Prandaj rreshtimin tim në këtë betejë e shoh si vazhdimësi të përpjekjeve tona dhe të të gjithë atyre që e duan Kosovën seriozisht dhe pa mashtrime.
E di që kam shumë miq e bashkëpunëtor që kanë pritur të jap kontributin tim krah Bedri Hamzës. Por dua t’ju them hapur, Bedriu në këtë garë është vetëm një kandidat kukull në duarët e “pionerëve” pa libreza të PDK, i thirrur vetëm për me mbajt stafeta me recitue vjersha të shkruara nga “kullerat” e njëjtë që e përdorën më 9 shkurt të cilët duan ta përdorin sërish më 28 dhjetor dhe për ta hedhur pastaj si të papërdorshëm dhe pa asnjë vlerë.
Unë nuk kam mund të jam pjesë e asaj loje.
Unë jam në këtë betejë politike për Kosovën, jo për skenarë të dështuar dhe jo për figurina politike që tunden sipas interesit të dikujt tjetër.
Zafa
