Shtetet e Bashkuara të Amerikës kanë njoftuar pezullimin e procesimit të vizave imigruese për shtetasit e 75 vendeve, përfshirë Kosovën dhe Shqipërinë, në kuadër të një rishikimi të procedurave të verifikimit. Masa pritet të hyjë në fuqi më 21 janar 2026 dhe nuk ka afat të përcaktuar.
Sipas raportimeve, udhëzimi është dërguar për përfaqësitë konsullore që, duke u mbështetur në legjislacionin ekzistues, të refuzojnë aplikimet për viza imigruese derisa të përfundojë rishqyrtimi i plotë i procesit të kontrollit dhe verifikimit.
Masat lidhen me dispozitën ligjore të njohur si “public charge”, e cila u jep autoriteteve amerikane të drejtën të refuzojnë aplikime kur vlerësohet se aplikanti mund të bëhet përfitues i ndihmave publike. Në vlerësim përfshihen faktorë si mosha, shëndeti, gjendja financiare, aftësitë/arsimimi dhe elemente të tjera që lidhen me vetë-mjaftueshmërinë ekonomike.
Zëdhënësi i Departamentit të Shtetit, Tommy Piggott, ka deklaruar se SHBA do të përdorë autoritetin ligjor për të parandaluar hyrjen e personave që mund të shfrytëzojnë sistemin e përfitimeve publike.
Përjashtimet pritet të jenë të kufizuara dhe do të shqyrtohen rast pas rasti.
Kosova dhe Shqipëria janë pjesë e listës së vendeve të prekura nga kjo masë, e cila përfshin shtete nga Ballkani, Evropa Lindore, Afrika, Azia dhe Amerika Latine. Vendimi pritet të ndikojë drejtpërdrejt te qytetarët që synojnë emigrimin në SHBA përmes vizave imigruese.
Lista e plotë e vendeve: Afganistani, Shqipëria, Algjeria, Antigua dhe Barbuda, Armenia, Azerbajxhani, Bahamas, Bangladeshi, Barbadosi, Bjellorusia, Belize, Butani, Bosnje dhe Hercegovina, Brazili, Birmania, Kamboxhia, Kameruni, Kepi i Gjelbër, Kolumbia, Bregu i Fildishtë, Kuba, Republika Demokratike e Kongos, Dominika, Egjipti, Eritrea, Etiopia, Fixhi, Gambia, Gjeorgjia, Gana, Grenada, Guatemala, Guinea, Haiti, Irani, Iraku, Xhamajka, Jordania, Kazakistani, Kosova, Kuvajti, Kirgistani, Laosi, Libani, Liberia, Libia, Maqedonia, Moldavia, Mongolia, Mali i Zi, Maroku, Nepali, Nikaragua, Nigeria, Pakistani, Republika e Kongos, Rusia, Ruanda, Shën Kits dhe Nevis, Shën Luçia, Shën Vincent dhe Grenadines, Senegali, Sierra Leone, Somalia, Sudani i Jugut, Sudani, Siria, Tanzania, Tajlanda, Togo, Tunizia, Uganda, Uruguaji, Uzbekistani dhe Jemeni.
