Kryetari i Lidhjes Demokratike të Kosovës, Lumir Abduxhiku ka bërë një thirrje publike për bashkëngjitje në këtë parti.
Në një postim në Facebook, ai ka ftuar institucionalistët dhe mbështetësit e Republikës që t’i bashkohen LDK-së.
Abdixhiku tha se ka vendosur të nisë një bashkim të madh politik dhe qytetar, i cili sipas tij do të tejkalojë dallimet e vogla, ambiciet e mëdha dhe hidhërimet e së shkuarës.
Postimi i plotë:
“Koha kërkon bashkim.
Të institucionalistëve, mbështetësve të Republikës dhe të gjithë udhëtarëve të rrugës euroatlantike.
Të gjithë këta kanë një shtëpi të përbashkët – Lidhjen Demokratike të Kosovës.
Prandaj, do të nis bashkimin e madh politik e qytetar rreth një projekti të përbashkët. Një projekti që tejkalon secilin prej nesh. Që tejkalon dallimet e vogla, ambiciet e mëdha dhe hidhërimet e së shkuarës. Ato, në kohë krizash dhe përballë fateve të mëdha të së ardhmes, bëhen krejtësisht të parëndësishme.
Dramat e sotme, krizat e përvitshme dhe fajësimet e pandalshme po e shterojnë Kosovën. Vendit i duhet një tjetër rrëfim. Një rrëfim që bashkon, që normalizon jetën politike, që zhvillon shtetin dhe e ankoron përgjithmonë në Perëndim.
Le ta bëjmë.
Do ta bëjmë!” ✌️
