Kryetari i Lidhjes Demokratike të Kosovës, Lumir Abdixhiku, ka bërë të ditur se kjo parti ka siguruar nënshkrimet e nevojshme për kandidaturën e Vjosa Osmani për presidente të vendit.
Abdixhiku ka treguar publikisht listën e nënshkrimeve.
Kështu duke theksuar mbështetjen e plotë të subjektit që ai drejton për Osmanin në këtë proces.
“Ja ku janë 15 nënshkrime të Lidhjes Demokratike të Kosovës dhe besoj që kjo ishte dashur ta përmbyllë gjithë debatin politik në Kosovë. 15 nënshkrime të LDK-së, për kandidatin e propozuar të LDK-së, por unë këto nënshkrime nuk kam dashur t’i bëj pjesë të lojërave politike, sepse janë serioze”.
“LDK-ja megjithatë vepron në mënyrë shumë institucionale dhe është serioze në qëndrimet e veta politike, nuk propozon diçka LDK-ja çfarë s’mund t’i qëndrojë prapa politikisht”, u shpreh ai.
Ky veprim vjen në kuadër të procedurave për zgjedhjen e presidentit të ri, ku kërkohet mbështetje formale nga deputetët për të avancuar kandidaturën në Kuvend.