Geci kërkon zbardhjen e pretendimeve për 52 mijë dollarët e Rubinit: Pse heshtet për fjalët e tij në Hagë?

Aktuale

Geci kërkon zbardhjen e pretendimeve për 52 mijë dollarët e Rubinit: Pse heshtet për fjalët e tij në Hagë?

Nga: N.E Më: 8 tetor 2026 Në ora: 09:29
James Rubin

Analisti dhe veprimtari Halil Geci ka reaguar lidhur me pretendimet për pagesa mujore prej rreth 52 mijë dollarësh për diplomatin amerikan James Rubin dhe angazhimin e tij në përpjekjet për një marrëveshje që, sipas tij, lidhej edhe me çështjen e ndarjes së Kosovës.

Geci, duke iu referuar një shkrimi të Jona Çitakut, ka ngritur pyetje mbi atë që ai e konsideron si mungesë të debatit publik rreth dëshmisë së Rubinit në Hagë.

“Ku është e vërteta për 52 mijë dollarët e Rubinit? A po e fshehin ‘tradhtarët’ të vërtetën për ‘tradhtarin’? Pse heshtet për fjalët e Rubinit në Hagë?”, ka shkruar Geci.

Ai pretendon se, sipas versionit të publikuar të dëshmisë, Rubini është pyetur për pagesat prej rreth 52 mijë dollarësh në muaj gjatë viteve 2018–2020, si dhe për angazhimin e tij në përpjekjet për arritjen e një marrëveshjeje që përfshinte edhe çështjen e ndarjes së Kosovës.

Geci ka kërkuar që këto pretendime të trajtohen publikisht dhe të verifikohen.

“Nëse kjo është thënë publikisht në sallën e gjyqit, atëherë pyetja është e thjeshtë: Pse nuk flitet për këtë?”, ka shkruar ai.

Sipas Gecit, çdo dëshmi që prek territorin dhe sovranitetin e Kosovës, por edhe përdorimin e parave të qytetarëve, duhet të bëhet pjesë e debatit publik.

“Nuk duhet të ketë heshtje për asnjë dëshmi që prek territorin, sovranitetin dhe paratë e qytetarëve të Kosovës”, ka deklaruar ai.

Në reagimin e tij, Geci ka përdorur tone të ashpra ndaj atyre që, sipas tij, po heshtin për këtë çështje, duke akuzuar se “e vërteta” po mbulohet me heshtje.

Ai ka përfunduar duke kërkuar që pretendimet për paratë, lobimin dhe çështjen e territorit të Kosovës të hetohen dhe të verifikohen publikisht, në mënyrë që të sqarohet se çfarë është thënë realisht në Hagë dhe cilat kanë qenë rrethanat e këtyre pagesave.

Reagimi i plotë (pa ndërhyrje):

KU ËSHTË E VËRTETA PËR 52 MIJË DOLLARËT E RUBINIT?

A PO E FSHEHIN “TRADHTARËT” TË VËRTETËN PËR “TRADHTARIN”?

PSE HESHTET PËR FJALËT E RUBINIT NË HAGË?

Jona Çitaku po shtron një pyetje serioze: pse asnjë medium, asnjë gazetar, asnjë analist dhe asnjë politikan nuk po e trajton publikisht atë që i atribuohet dëshmisë së James Rubinit në Hagë?

Sipas versionit të publikuar të dëshmisë, Rubini është pyetur për pagesat prej rreth 52 mijë dollarësh në muaj, gjatë viteve 2018–2020, dhe për angazhimin e tij lidhur me përpjekjet për një marrëveshje që përfshinte edhe çështjen e ndarjes së Kosovës.

Nëse kjo është thënë publikisht në sallën e gjyqit, atëherë pyetja është e thjeshtë:

Pse nuk flitet për këte?

Unë, Halil Geci, po e them hapur: nuk duhet të ketë heshtje për asnjë dëshmi që prek territorin, sovranitetin dhe paratë e qytetarëve të Kosovës.

Ju që e mbuloni të vërtetën jeni më tradhtarë se vetë tradhtari! E vërteta nuk duhet të mbulohet me heshtje, por të kërkohet, të verifikohet dhe të denoncohet publikisht.

Kur përmenden paratë e qytetarëve, lobimi dhe çështja e territorit të Kosovës, heshtja nuk është përgjigje.

comment Për komente lëvizni më poshtë
Sot mund të lexoni Shfletoni kopertinat