Robert Reilly emërohet drejtor i VOA, Biberaj kthehet në pozicionin e mëparshëm

Amerika

Robert Reilly emërohet drejtor i VOA, Biberaj kthehet në pozicionin e mëparshëm

Më: 9 dhjetor 2020 Në ora: 20:22
VOA

Shefi ekzekutiv i Agjencisë Amerikane për Mediat Globale (USAGM) Michael Pack emëroi zotin Robert Reilly si drejtor të ri të VOA, ndërkohë që Drejtori i Përkohshëm Elez Biberaj tha se do të kthehet në pozicionin e tij të mëparshëm, si kreu i departamentit të Euroazisë.

Zoti Biberaj, i cili u emërua drejtor i përkohshëm i Zërit të Amerikës në qershor, i dërgoi një email stafit të martën vonë, duke thënë se koha e qëndrimit të tij në këtë pozicion po përfundon dhe se ai i uron drejtorit të ri suksese në përmbushjen e misionit të Zërit të Amerikës.

Image
Elez Biberaj

USAGM njoftoi të mërkurën se Robert Reilly, autor dhe diplomat, i cili ka punuar në VOA mes viteve 2001 dhe 2002 është emëruar drejtor i ri i VOA. Zoti Reilly është shprehur publikisht në mbështetje të kreut të USAGM, Pack.

Muajin e kaluar një gjyqtar federal tha se disa nga vendimet e zotit Pack si kreu i USAGM shkelnin të drejtat e Amendamentit të Parë të Kushtetutës, që gëzojnë gazetarët. Gjyqtari urdhëroi zotin Pack të ndalte ndërhyrjen në mbulimin e lajmeve të Zërit të Amerikës si dhe kryerjen e hetimeve mbi gazetarët e saj. Megjithatë zoti Pack ruan kompetencën për të zgjedhur një drejtor të ri të Zërit të Amerikës.

Në emailin e tij për stafin, zoti Biberaj shkruante se “gjashtë muajt e fundit kanë qenë periudha më sfiduese në historinë e kohëve të fundit të Zërit të Amerikës”. Ai thekson se "disa zyrtarë të USAGM nuk respektuan rregullat, protokollet dhe proceset, që unë i konsideroj të paprekshme", duke shtuar se "përpjekjet për të shkelur pavarësinë e gazetarëve të Zërit të Amerikës kërcënuan të minonin besueshmërinë tonë të fituar me shumë punë", por pa hyrë në detaje.

Zoti Biberaj njoftoi se do të kthehet në pozicionin e tij të mëparshëm si drejtor i Sektorit të Euroazisë të Zërit të Amerikës.

Image
Michael Pack

Presidenti Donald Trump e emëroi zotin Michael Pack si kreun ekzekutiv të USAGM më shumë se dy vjet më parë, por Senati nuk pranoi ta shqyrtonte kandidaturën e tij, deri në qershor të këtij viti. Agjencia Amerikane për Mediat Globale mbikëqyr Zërin e Amerikës, Radion Azia e Lirë, Radion Evropa e Lirë dhe transmetuesit e tjerë ndërkombëtarë të financuar nga SHBA. /VOA

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat