Bisedimet midis qeverisë libaneze dhe Fondit Monetar Ndërkombëtar mbi një plan të rimëkëmbjes ekonomike duhet të përparojnë në dy javët e ardhshme, tha të shtunën kryeministri Najib Mikati.
Duke folur me gazetarët në Katar, ku ai po merr pjesë në Forumin e Dohas, Mikati tha se një delegacion i FMN-së do të rifillojë bisedimet me qeverinë në Bejrut të martën mbi krizën ekonomike të vendit që filloi më shumë se dy vjet më parë, shkruan AP, transmeton "Bota sot".
Bisedimet midis Libanit dhe FMN-së filluan në maj 2020, më pas u ndalën për muaj të tërë mes një bllokimi politik në vendin e vogël. Ato rifilluan pasi Mikati mori detyrën në shtator, por që atëherë nuk është bërë asnjë përparim.
Një pengesë kryesore në bisedime ka qenë vlerësimi i sasisë së humbjeve financiare. Por në fund të vitit të kaluar, zëvendëskryeministrja Saadeh Shami, e cila drejton bisedimet me FMN-në, vlerësoi humbjet e sektorit financiar në 69 miliardë dollarë.
