Presidenti ukrainas Volodymyr Zelensky i bëri thirrje komunitetit ndërkombëtar që ta njohë zyrtarisht Rusinë si një shtet terrorist në fjalimin e tij të natës të enjten pas sulmit në Vinnytsia.
“Rusia ka treguar qëndrimin e saj ndaj ligjit ndërkombëtar, ndaj Evropës dhe ndaj gjithë botës së qytetëruar”, tha Zelensky, shkruan CNN, përcjell “Bota sot”.
Ai shtoi, "Pas kësaj, askush nuk mund të ketë asnjë dyshim se një Gjykatë Speciale për agresionin rus kundër Ukrainës është e nevojshme sa më shpejt të jetë e mundur."
Vërejtjet e Zelensky vijnë pasi raketat goditën qytetin e Vinnytsia të enjten. Ai tha se në mesin e 23 personave të vrarë ishin tre fëmijë nën moshën 10 vjeç.
Presidenti bëri thirrje për konfiskimin e "të gjitha aseteve dhe fondeve ruse në të gjitha vendet e botës" për të kompensuar "viktimat e terrorit rus".
"Është absolutisht e nevojshme të zbatohen sa më shpejt të jetë e mundur kufizime të tilla kundër eksporteve ruse të energjisë, të cilat nuk do t'i lejojnë terroristët të mbulojnë kostot e tyre në kurriz të komunitetit ndërkombëtar," shtoi ai.
Sipas Zelensky, një numër përfundimtar i viktimave është ende duke u sqaruar pasi "pastrimi i mbeturinave është në vazhdim" dhe "dhjetëra njerëz janë të listuar si të zhdukur".
"Një nga raketat shkatërroi qendrën mjekësore Neuromed. Kishte njerëz brenda," tha ai.
Presidenti tha se në mesin e të vdekurve ishte një vajzë katërvjeçare e quajtur Liza dhe shtoi se nëna e saj është në gjendje kritike për momentin.
“Rusia i dha fund jetës së vajzës pikërisht në kohën kur një konferencë mbi krimet e luftës ruse po zhvillohej në Holandë, në Hagë”, tha Zelensky.
