Të paktën 19 persona janë vrarë në një sulm ajror të ushtrisë kolumbiane ndaj një kampi të dyshuar rebel në provincën Guaviare, raporton BBC.
Sipas autoriteteve, shënjestra ishte një fraksion disident i grupit Farc, i përfshirë në trafikun e drogës. Presidenti Gustavo Petro, i cili më parë kishte shmangur përdorimin e sulmeve ajrore, e autorizoi operacionin pas dështimit të bisedimeve të paqes me disa grupe të armatosura.
Ministri i Mbrojtjes, Pedro Sanchez, tha se kampi i përkiste një grupi të udhëhequr nga Ivan Mordisco, ish-anëtar i Farc, i cili tani merret me miniera të paligjshme, zhvatje dhe trafik droge. Ai e përshkroi Mordiscon si “një nga kriminelët më të rrezikshëm në vend”.
Gjatë operacionit u arrestuan tre persona dhe u shpëtuan tre fëmijë të rekrutuar nga grupi. Organizatat e të drejtave të njeriut kanë paralajmëruar për rritjen e rekrutimit të fëmijëve në konfliktet e armatosura, duke dokumentuar se fëmijët aq të rinj sa nëntë vjeç, janë rrëmbyer ose tërhequr nga prindërit e tyre me premtime të rreme.
Petro, presidenti i parë i majtë në historinë e Kolumbisë, nisi bisedime paqeje me grupet e armatosura, por ato me grupin e Mordiscos dështuan pas gjashtë muajsh. Qeveria e fajëson atë për një sulm me eksploziv në Kali.
Pas sulmit, Petro e quajti Mordiscon “një trafikant droge të maskuar si revolucionar”. Ai është nën presion nga SHBA për të frenuar trafikun e kokainës. Muajin e kaluar, SHBA vendosi sanksione financiare ndaj tij, ndërsa Petro akuzoi Uashingtonin për “vrasje” pas sulmeve ndaj anijeve të dyshuara për trafik droge.
Të martën, ai shprehu përsëri kundërshtimin e tij ndaj sulmeve të SHBA-së - në të cilat janë vrarë të paktën 76 persona dhe urdhëroi qeverinë e tij të pezullojë ndarjen e informacionit të inteligjencës me agjencitë e sigurisë amerikane.
“Lufta kundër drogës duhet t’u nënshtrohet të drejtave të njeriut të popujve të Karaibeve”, deklaroi Petro në X.