​11-vjeçari përplas kamionçinën në pelegrinë, mbyt 8 murgj, plagos 14 tjerë

Bota

​11-vjeçari përplas kamionçinën në pelegrinë, mbyt 8 murgj, plagos 14 tjerë

Më: 2 korrik 2026 Në ora: 11:13
Fotoilustrim

Tetë murgj budistë vdiqën e 14 të tjerë u plagosën, katër prej të cilëve rëndë, pasi një djalë 11-vjeçar përplasi një kamionçinë në ta.

Ngjarja tragjike ndodhi në provincën Mukdahan të Tajlandës, gjatë një pelegrinazhi të grupit prej 35 pelegrinësh, në mesin e të cilëve ishin edhe viktimat. Ata ishin nisur drejt krahinës tjetër, Ubon Ratchathani, kur u goditën nga kamionçina që po e ngiste 11 vjeçi, pas vetëm 30 minuta ecje

Guvernatori i provincës Mukdahan, Worrayan Boonnarat, tha se pesë murgj humbën jetën në vendngjarje, ndërsa tre të tjerë ndërruan jetë në spital, raporton AP, transmeton KosovaPress.

Pamjet e kamerave të sigurisë, të publikuara nga një shoqatë lokale e shpëtimit, tregojnë murgjtë duke ecur në një kolonë përgjatë anës së rrugës, kur kamionçina del nga korsia dhe përplaset me ta.

Policia bëri të ditur se 11-vjeçari është ndaluar dhe do të merret në pyetje në prani të zyrtarëve të mbrojtjes së fëmijëve.

Shkaqet e aksidentit mbeten ende të pasqaruara.

Sipas policisë, dëshmitarët nga grupi i murgjve kanë deklaruar se panë automjetin duke lëvizur në mënyrë të çrregullt në rrugë përpara se të dilte nga korsia dhe të përplasej me ta.

Sot mund të lexoni Shfletoni kopertinat