Njësitë Antikontrabandë të Doganës së Kosovës, në bashkëpunim me Policinë Kufitare, kanë zbuluar dhe konfiskuar një sasi të madhe pajisjesh telefonike dhe elektronike në një subjekt tregtar në Prishtinë.
Dogana e Kosovës njofton se Njësitë Antikontrabandë të këtij institucioni në bashkëpunim me Sektorin e Hetimeve të Departamentit të Policisë Kufitare, kanë zhvilluar një kontroll të papritur në një subjekt që merrej me shitjen e pajisjeve telefonike.
Gjatë kontrollit janë gjetur dhe konfiskuar 120 telefona celularë të markave iPhone dhe Samsung, 5 ora të mençura Apple dhe disa kufje origjinale Apple. Vlera e përgjithshme e mallit të konfiskuar vlerësohet të jetë rreth 60,000 euro.
"Ky operacion është pjesë e angazhimeve të përbashkëta të Doganës së Kosovës dhe Policisë së Kosovës në luftimin e të gjitha formave të kontrabandës dhe krimit ekonomik, me qëllim të mbrojtjes së tregut të brendshëm, interesit fiskal të shtetit dhe konkurrencës së ndershme", theksohet në njoftim.
