Nanat na lindën me lindje natyrale
nuk kishte as mjek për lindje
e as për prerje cesariane
na rritën me bukë të grunit
të arave pa plehra speciale
kryem klasën me dituri natyre
e me mësues normalë
atëhere kur shkonim në shkolla
edhe në kushte
të jashtëzakonshme
vetëm që të dukeshim normalë
edhe paraluftën na e bënë
luftë speciale
edhe në demostrata na rrahte
milicia speciale
na dilte para në sheshe
me pizgauerra autoblinda
e njësi speciale
patëm një rini speciale
që natyrisht nuk i lejohej frika
as të dorëzohej kurrë
lufta e fundit ishte e vërtetë
edhe pse rrejnë
se ishte konflikt special
të vdekurit ishin viktima speciale
u trajtuan në mënyrë speciale
i zhvarrosen për ti zhdukur
gjurmët e gjenocidit
në varre speciale masive
në poligone të policisë speciale
në Serbi
ne bëmë edhe shtetin
republikë me pako
e rezoluta speciale
edhe me qytetari speciale sui generis
me flamur special
me himn që e këndojmë
me heshtje speciale
me deklaratë pavarësie speciale
me liderë specialë
që zgjidhen me zgjedhje speciale
me qeveri që bien e ndërrohen
në rrethana speciale
me presidentë që shkarkohen
në kushte speciale
me parlament që voton ligje
e gjykatë speciale
që gjykojnë në emrin e popullit
me drejtësi speciale
krejt na duan specialë
të bindur e pa zë neve
që nuk arritëm
të bëhemi as natyralë.
